बुटवल । पत्रकार आचारसंहिता कडाईका साथ कार्यान्वन गर्दै पत्रकारिता पेशालाई मर्यादित र व्यवसायिक बनाउनुपर्नेमा सरोकारवालाहरुले जोड दिएका छन् । उनीहरुले पत्रकारको पेशागत र भौतिक सुरक्षाको सुनिश्चितता गर्दै पत्रकारलाई आचारसंहिता पालना गराउन आवश्यक रहेको समेत बताएका छन् । नेपाल पत्रकार महासंघ, रूपन्देहीले मंगलबार बुटवलमा आयोजना गरेको आगामी कार्यदिशा केन्द्रित छलफल कार्यक्रममा बोल्दै अगुवा पत्रकारहरुले आचारसंहिता कार्यान्वयन गर्दै पत्रकारका नाममा भइरहेको प्रेसको दुरूपयोग रोक्नुपर्ने बताएका हुन् ।
कार्यक्रममा बोल्दै नेपाल पत्रकार महासंघ, रुपन्देहीका पूर्व अध्यक्ष डा. बालकृष्ण चापागाईले पत्रकार महासंघले रुपन्देहीको पत्रकारिताको इतिहास खोतलेर अनुसन्धान गर्नुपर्ने बताए । उनले पत्रकार महासंघको गरिमा उँचो बनाउने गरि काम गर्ने सवालमा सदैव आफु महासंघको साथमा रहने प्रतिबद्धता ब्यक्त गरे ।
महासंघका पूर्व अध्यक्ष विनोद पहाडीले पत्रकारहरुको क्षमता अभिवृद्धी र पेशागत सुरक्षामा पत्रकार महासंघ केन्द्रित हुनुपर्ने बताए ।
त्यस्तै पूर्व अध्यक्ष हरि लम्सालले पत्रकारिता पेशालाई सम्मानित बनाउन आचारसंहिता कार्यान्वन गर्न महासंघले पहल कदमी लिनुपर्ने बताए । उनले पत्रकारिता पेशाको गरिमा र मर्यादा कायम राख्ने गरि काम गर्न महासंघको नेतृत्वलाई सुझाव दिए ।
महासंघका सल्लाहकार दिनेश पाण्डेले पत्रकारितालाई सवल र सुधृढ बनाउन पत्रकारहरुमा सुद्धिकरण जुरुरी रहेको बताए ।
प्रेस स्वतन्त्रता सेनानी अर्जुन ज्ञवालीले पत्रकार आचारसंहिता पालना गराउन नियमित प्रशिक्षण आवश्यक रहेको बताए ।
कार्यक्रममा विभिन्न दल आवद्ध पत्रकार संगठनका जिल्ला नेतृत्व तथा पेशागत संगठनका प्रमुखहरुले पत्रकारको मर्यादा र महत्वका बिषयमा सुझाव दिएका थिए । महासंघ रुपन्देहीका अध्यक्ष रामराज पोखरेलको अध्यक्षतामा भएको कार्यक्रममा उपाध्यक्ष विश्वास ढकालले स्वागत गरेका थिए भने महिला उपाध्यक्ष अमृता अनमोलले धन्यवाद ज्ञापन गरेकी थिइन् ।
प्रतिक्रिया