काठमाडौं । निर्वाचन आयोगले जनता समाजवादी पार्टीको आधिकारिकताको निर्णय विरुद्ध विरुद्ध महन्थ ठाकुरले दिएको रिटमा सर्वोच्च अदालतले अन्तरिम आदेश दिन अस्वीकार गरेको छ ।
आयोगले उपेन्द्र यादव पक्षलाई आधिकारिकता दिएपछि ठाकुर सो निर्णय विरुद्ध सर्वोच्चमा रिट दायर गरेका थिए ।
बुधबार न्यायाधीश प्रकाशमानसिंह राउतको इजलासले ठाकुरको रिट निवेदनको बुधबार सुनुवाइ गर्दै अन्तरिम आदेश जारी गर्न नपर्ने फैसला गरेको हो ।
तर, ठाकुरले विपक्षी बनाएका उपेन्द्र यादव र निर्वाचन आयोगलाई सर्वोच्चले कारण देखाउन आदेश जारी गरेको छ । ठाकुरको माग अनुसार गर्नु नपर्ने हो भने कारण र आधार खुलाई बाटोको म्यादबाहेक १५ दिनभित्र जवाफ पेश गर्न दुवै विपक्षीलाई सर्वोच्चले भनेको छ । यस्तै जसपाको विवादसँग जोडिएका अन्य मुद्दालाई पनि सँगै राखेर पेश गर्न इजलासले आदेश दिएको छ ।
निर्वाचन आयोगले यही साउन ११ गते जसपाको केन्द्रीय कार्यकारिणी समितिका सदस्यको हेड काउन्ट गरेर हस्ताक्षर सनाखत गरेपछि उपेन्द्र यादव पक्षलाई आधिकारिकता दिने निर्णय गरेको थियो । आयोगको निर्णयले आफुहरुलाई अपुरणीय क्षति भएको भन्दै ठाकुरले वारेसमार्फत सर्वोच्चमा रिट दायर गरेका थिए ।
प्रतिक्रिया