बुटवल । सत्ताको खेल पेचिलो बन्दै गएको लुम्बिनी प्रदेशमा विपक्षी गठबन्धनले आफ्नो सांसदहरुलाई जोगाउन एक रिसोर्टमा राख्ने व्यवस्था मिलाएको छ । सत्तापक्षले एक एक गर्दै विपक्षी गठबन्धनका सांसदलाई फकाउन थालेपछि विपक्षी गठबन्धनका सांसदहरुलाई रिसोर्टमा राख्न थालिएको हो ।
शंकर पोखरेल नेतृत्वको प्रदेश सरकार विरुद्ध २ संख्याले बहुमतमा रहेका विपक्षीहरुले आफ्ना पक्षका ४१ सांसदलाई कपिलवस्तुको बाणगंगा नगरपालिकास्थित राजापानी रिसोर्टमा पुग्न निर्देशन भएको एक सांसदले बताए ।
२७ साउनको बैठकमा अविश्वासको प्रस्तावमाथि छलफल हुने तय भएको र त्यस यता कुनै सांसदहरु सत्तारुढ दलको प्रभावमा नपरुन भनेर रिसोर्टमा आवाशिय व्यवस्था गरिएको विपक्षी गठबन्धन स्रोतले बतायो । तर गठबन्धनका नेताहरुले भने आगामी रणनीतिबारे छलफल गर्न ४१ जना सांसदलाई रिसोर्टमा बोलाईएको बताए ।
२ जना संख्या नपुगेका कारण समास्यामा परेका प्रदेशका मुख्यमन्त्री सकेसम्म २ जना सांसदलाई फकाउने रणनितीमा लागेका छन् । सत्ता पक्षीय रणनिती अनुसार केही हप्ताअघि जसपा सांसद पुर्मती ढेंगालाई फकाउने प्रयास भएको थियो भने अघिल्लो हप्तामात्र माओवादी केन्द्रका सांसद विमला खत्री वलीलाई ५ दिन मुख्यमन्त्री निवासमा ‘बन्धक’ बनाईएको थियो । मुख्यमन्त्री शंकर पोखरेलको निवासमा ‘बन्धक’ बनाएर राखेको भन्दै सांसद वलीले शौचालयको चप्पल लगाएर भागेको पत्रकार सम्मेलनमा जानकारी दिएकी थिइन् ।
सर्वोच्चले जसपाका तीन सांसदलाई पुनर्बहाली गर्न अस्वीकार गरेपछि मुख्यमन्त्री पोखरेल स्पष्ट अल्पमतमा छन् । मुख्यमन्त्री पोखरेलले एकजना कानुन ब्यवसायीलाई लगाएर सर्वोच्च अदालतमा प्रदेशसभा अधिवेशन स्थगनका लागि रिट हाल्न लगाएपनि अदालतबाट दरपीठ भएपछि उनी अझै प्रेसरमा परेका छन् । पोखरेलले रातारात एमाले सांसद लिला गिरि सहितका सांसदहरुलाई बोलाएर आज पुनः सर्वोच्चमा अधिवेशन स्थगनको आदेश माग गर्दै रिट हाल्न लगाएका छन् । २७ गते यता सर्वाेच्चले संसद अधिवेशन स्थगनकाे अन्तरिम आदेश नगरेमा पाेखरेल नेतृत्वकाे सरकार ढल्ने निश्चित जस्तै देखिएकाे छ ।
प्रतिक्रिया