काठमाडौं । मित्रराष्ट्र पाकिस्तानले नेपाललाई स्वास्थ्य सामाग्री सहयोग गरेको छ ।
नेपालस्थित पाकिस्तानी दूतावासका चार्ज डे अफेयर्स अदनान जावेद खानले बिहीबार स्वास्थ्य तथा जनसंख्या मन्त्रालयका सचिव डाक्टर रोशन पोखरेललाई ती स्वास्थ्य सामाग्री हस्तान्तरण गरेका छन् ।
स्वास्थ्य मन्त्रालयमा आयोजित एक कार्यक्रमका बीच चार्ज डे अफेयर्स खानले झण्डै दुई करोड रुपैयाँ बराबरका स्वास्थ्य सामाग्री हस्तान्तरण गरेको पाकिस्तानी दूतावासले जनाएको छ । जसमा ३० वटा भेन्टिलेटर, ३० वटा श्वासप्रश्वाससम्बन्धी सीपीएपी मेशीन सामेल छन् । ‘मेड इन पाकिस्तान’ उपकरणहरुको मूल्य १ करोड ९० लाख नेपाली रुपैयाँ भन्दा बढी रहेको छ ।
यो स्वास्थ्य उपकरण सार्क सदस्य राष्ट्रहरुका लागि कोभिड–१९ आपतकालीन सहायता कार्यक्रमको एक हिस्सा रहेको दूतावासले जनाएको छ । यसअघि यही कार्यक्रमअन्तर्गत पाकिस्तनले नेपाललाई ४ करोड ३० लाख रुपैयाँको आर्थिक सहयोग गरेको थियो ।
स्वास्थ्य सामाग्री बुझ्दै स्वास्थ्य सचिव डा. पोखरेलले नेपालको कोरोना भाइरसको रोकथाम, नियन्त्रण र उपचारका लागि उदारतापूर्वक योगदान गरेकोमा पाकिस्तान सरकारलाई धन्यवाद दिएका थिए ।
पाकिस्तानी दूतावासका चार्ज डे अफेयर्स खानले कोरोना महामारी विरुद्धको नेपालको लडाईंलाई पाकिस्तानले निरन्तर साथ दिने प्रतिवद्धता जनाएका थिए ।
पाकिस्तानले नेपाललाई विगतदेखि नै निरन्तर सहयोग गर्दै आएको छ ।
प्रतिक्रिया