बुटवल । नेकपा एमालेले लुम्बिनी प्रदेशका बिनाविभागिय मन्त्री अजय शाही र सांसद विमला खत्री ओलीको प्रदेशसभा सदस्यबाट पदमुक्त गर्ने पत्र कार्यान्वयन नभए संसद अवरुद्ध गर्ने तयारी गरेको छ।
एमालेको सूर्य चिन्ह लिएर प्रदेशसभामा निर्वाचित भएका शाही र अदालतले भङ्ग गरिदिएको नेकपाको सुर्य चिन्हबाट चुनाव लडेर निर्वाचित विमला ओलीले पार्टीको विधान र संसदीय दलको विधान, नियम र पार्टीको निर्देशनविपरीत कार्य गरेको भन्दै पदमुक्त गर्न प्रदेशसभाका सभामुखलाई पत्र बुझाएकोमा संसद बैठक शुरु हुनु अघि पत्र कार्यान्वयन हुनु पर्ने एमालेको माग छ । पत्र अनुसार २ जना सांसदलाई पदमुक्त नगरे प्रदेशसभा चल्न नदिने एमालेले चेतावनी दिएको छ ।
प्रमुख विपक्षीको यस्तो चेतावनी आएपछि १ बजेबाट बस्ने भनिएको प्रदेशसभाको बैठक २ बजे सम्म शुरु हुन सकेको छैन । संसद शुचारु गर्ने सम्बन्धमा सभामुख पुर्ण घर्तीले सत्तारुदलसंग परामर्श गरिरहेका छन् ।
प्रदेशसभा सदस्य अजय शाही संसदमा स्वतन्त्र हैसियत हुने सर्तमा २०७४ सालमा सम्पन्न प्रदेशसभा सदस्य निर्वाचनमा नवलपरासीको क्षेत्र नं १ ख बाट सूर्य चिन्ह लिएर निर्वाचित भएका थिए भने विमला खत्री वली एमाले र माओवादी एकिकरण पछि बनेको नेकपाको उम्मेदवारका रुपमा सुर्य चिन्हबाट चुनावमा भाग लिएकी थिईन् ।
शाहीले चुनावमा भाग लिने बेलामा नै स्वतन्त्र हैसियत कायम रहने सर्तमा चुनाव लडेकाले नेकपा एमालेको ह्विप नलाग्ने दाबी गर्दै आएका छन्। सांसद वली भने फागुन २३ गते सर्वोच्चबाट एमाले र माओवादी केन्द्रलाई अलग गराईदिएको झण्डै १ महिनापछि चेत्रको अन्तिम साता आफुले माओवादी केन्द्र रोज्ने भन्दै पत्रकार सम्मेलन गरेर खलेकी थिईन् ।
प्रतिक्रिया