मुख्यमन्त्रीले विश्वासको मत लिएपछि एमालेको टिप्पणी – लुम्बिनी सरकारलाई मान्यता दिने प्रश्नै आउँदैन

बुटवल । नेकपा एमालेले कुलप्रसाद केसी नेतृत्वको लुम्बिनी प्रदेश सरकारलाई मान्यता नदिने स्पष्ट पारेको छ ।

मुख्यमन्त्री केसीले विश्वासको मत लिएपछि खबरकुरासँग कुरा गर्दै एमाले संसदीय दलका प्रमुख सचेतक भूमिश्वर ढकालले अवैधानिक सरकारलाई मान्यता दिन नसकिने बताएका हुन् ।

ढकालले संसदमा आज नाटक देखाइएको बताउँदै यस्तो सरकारलाई मान्यता दिने प्रश्नै नआउने बताए । उनले भने, ‘सरकार असंवैधानिक छ । बन्दा पनि अवैधानिक ढंगले बनेको हो । आज प्रदेशसभामा विश्वासको मत लिने नाटक गरिएको छ । यो अवैधानिक नाटकलाई हामीले मान्यता दिने कुरा हुँदैन । हामीले वैधानिक सरकारको मान्यता दिन सक्दैनौं ।’

अब पनि संसद अवरुद्ध नै गर्ने एमालेले जनाएको छ । ढकालले भने, ‘आफुहरुको माग बमोजिम दुई जना सांसदलाई पदमुक्त नगरेसम्म संसद अवरुद्ध गर्ने क्रम जारी रहन्छ ।’

मुख्यमन्त्रीले विश्वासको मत माग्दा एमालेले बैठक बहिस्कार गरेको थियो । आजै बसेको प्रदेशसभाको पहिलो बैठकमा एमाले सांसदहरुले रोष्टम घेराउ गरेका थिए ।