काठमाडौं । नेकपा एमालेबाट विभाजित प्रस्तावित नेकपा (एकिकृत समाजवादी)को आज पहिलो केन्द्रीय कमिटी बैठक बस्ने भएको छ । नेकपा (एस)को चन्द्रागिरि रिसोर्टमा आज पहिलो केन्द्रीय कमिटीको बैठक बस्न लागेको हो ।
आजको बैठकमा पार्टीको अन्तरिम विधान तथा सांगठानिक जिम्मेवारीका विषयमा छलफल हुने बताईएको छ । सोमबार रिसोर्ट पुगेका सबै सांसद तथा केन्दीय सदस्यहरुलाई पार्टीको अन्तरिम विधान अध्ययनका लागि उपलब्ध गराईसकिएको पार्टीका एक केन्द्रीय सदस्य रामकुमारी भाँक्रीले बताइन् । उनले आजको बैठकबाट विधान पास गरेर कार्यान्वयनमा लगिने जानकारी दिईन् ।
निर्वाचन आयोगले प्रस्तावित पार्टी दर्ता प्रयोजनका लागि सनाखत गर्न आयोगमा बोलाएको अघिल्लो दिन एकिकृत समाजवादीको केन्द्रीय कमिटी बैठक बस्न लागेको हो । आयोगले एस सहित लोकतान्त्रिक समाजवादी पार्टी(लोसपा)लाई पनि सनाखतका लागि ९ गते आयोगमा बोलाएको छ । सनाखत अघि बिधान आवश्यक पर्न सक्ने भन्दै प्रस्तावित केन्द्रीय कमिटीको बैठक बसेर विधान पास गर्न थालिएको बताइएको छ ।
माधव नेपालसहित उनी पक्षीय सबै नेताहरु आज बैठक बसेर बुधबार रिसोर्टबाट सिधै आयोग सनाखतका लागि पुग्ने तयारी भएको अर्का एक केन्द्रीय सदस्यले बताए ।
प्रतिक्रिया