बुटवल । बिहीबार साँझबाट परेको अबिरल वर्षाका कारण रूपन्देहीका धेरै स्थानहरू डुवानमा परेकाछन् भने पूर्व-पश्चिम राजमार्ग अवरुद्ध भएको छ ।
लगातार परेको वर्षा र पहिरोका कारण पूर्वपश्चिम राजमार्ग, सिद्धार्थ राजमार्ग, गोरूसिङ्घे सन्धिखर्क सडक पनि अवरुद्ध भएको छ । पूर्व-पश्चिम राजमार्गको बुटवल नारायणगढ खण्डको बर्दघाट बुटवल क्षेत्रमा रहेको ३ वटा डाईभर्सन बाढीले बगाएको छ ।
त्यस्तै देवदहको घोडाहामा रहेको पक्की पुल समेत भासिएको प्रदेश ट्राफिक कार्यालय बुटवलका प्रवक्ता डिल्लीनारायण पाण्डेले खबरकुरालाई जानकारी दिए ।
यता सिद्धार्थ राजमार्गको गिट्टीखोला नजिकै पहिरो खस्दा बुटवल तानसेन खण्ड र राम्दीपुल नजिकै पहिरो खस्दा बुटवल पोखरा खण्ड पनि अवरुद्ध भएको पाण्डेले बताए ।
वर्षाका कारण रूपन्देहीका धेरै स्थान डुवानमा परेका छन । तिलोत्तमा नगरकाको मणिग्राम, भलवारी, शान्तिनगर लगायतका स्थानमा घरभित्रै पानी पसेको स्थानीयले बताएका छन् ।
त्यस्तै अबिरल वर्षाका कारण रुपन्देहीको दक्षिणी क्षेत्रमा रहेको ओमसतिया, छपिया, रुद्रपुर, धकधही, मर्चवारी डुवानमा रहेको जिल्ला प्रहरी कार्यालय रुपन्देहीका प्रवक्ता सत्यनारायण थापाले जानकारी दिए ।
प्रतिक्रिया