माओवादी केन्द्र पहिलो नम्बरको पार्टी नबनी देश बन्दैन : प्रचण्ड

खबर कुरा
१४ भाद्र २०७८, सोमबार
                 

काठमाडौं । नेकपा माओवादी केन्द्रका अध्यक्ष ‘प्रचण्डले देश बनाउनका लागि माओवादी केन्द्र पहिलो पार्टी बन्ने पर्ने बताएका छन् । सर्लाही(काठमाडौं सम्पर्क समितिले राजधानीमा सोमबार आयोजना गरेको कार्यक्रममा बोल्दै अध्यक्ष प्रचण्डले माओवादी फेरि पहिलो नम्बर पार्टी नभइ देशमा राजनीतिक स्थायित्व र विकास नहुने दावी गरेका हुन् ।

उनले सबैको प्रयासले निरंकुश र प्रतिगामी तत्वहरु पछारिएको उल्लेख गर्दै तरपनि उनीहरूले षडयन्त्रको प्रयास नछाडेको स्पष्ट पारे । प्रचण्डले प्रदेश १ र बागमती प्रदेशमा पनि गठबन्धनको सरकार बन्ने दाबी गरे । प्रचण्डले एमालेको सरकार संघमा मात्रै नभएर केही दिनपछि १ नम्बर र बागमती प्रदेशमा पनि ढल्ने बताउँदै संसदमा एमाले अध्यक्ष केपी ओलीलाई आगोसँग खेल्ने प्रयास नगर्न आफुले सम्झाएको स्मरण गरे ।

उनले पार्टीलाई एक नम्बरमा ल्याउन कार्यकर्ताहरु शहर छाडेर गाँउ जान आवश्यक रहेको बताउँदै अभियान लिएर गाउँ-गाउँ जान सबै कार्यकर्तालाई आग्रह गरे । ‘जबसम्म माओवादी फेरि एक नम्बर पार्टी हुँदैन तबसम्म यो देशमा स्थायित्व र विकास हुँदैन,’ उनले भने, ‘दलाल, जाली फटाहाले मधेसको मसिहा बनेर कसरी जनतालाई नै चुस्छन् भन्ने अभियान लिएर जानुहोस् ।’ उनले आफ्नो पार्टीले मधेसमा कब्जा जमाउने समेत दावी गरे ।

प्रचण्डले मंगलबार नै गठबन्धनको बैठक बसेर सरकारलाई पूर्णता दिने जानकारी दिए । कार्यक्रममा सर्लाहीका बिभिन्न दलका कार्यकर्ताहरु पार्टी परित्याग गरेर माओवादी प्रवेश गरेका थिए ।

यसमा तपाइको मत

Your email address will not be published. Required fields are marked *


*