काठमाडौं । चार दिने नेपाल भ्रमणमा रहेकी अमेरिकी सहयोग परियोजना मिलेनियम च्यालेन्ज कर्पोरेसन (एमसीसी) उपाध्यक्ष फतिमा सुमारले राजनीतिक भेटघाट तीव्र पारेकी छन् ।
प्रमुख प्रतिपक्ष एमाले अध्यक्ष केपी ओलीलाई भेटेर राजनीतिक भेट यात्रा थालेकी उनी सत्तारुढ माओवादी केन्द्रका अध्यक्ष पुष्पकमल दाहाल प्रचण्डलाई भेट्न शुक्रबार बिहान खुमलटार पुगिन ।
भेटका क्रममा उपाध्यक्ष सुमारले एमसीसी पारित हुने विश्वसनीय वातावरण बनाउन आग्रह गरेकी छिन् । सुमारले एमसीसी नेपालको संविधान र राष्ट्रिय हित भन्दा बाहिर नरहेको भन्दै प्रचण्डलाई विश्वस्त गराउने प्रयास गरेकी छिन् ।
सुमारले आफू नेपाल कुनै दबाबका लागि नभई एमसीसीबारे स्थिति बुझ्न आएको बताएकी थिइन । यसबारे राजनीतिक दलहरूले नै निर्णय गर्ने बताउँदै उनले सकारात्मक निर्णय हुनेमा आफु आशावादी रहेको धारणा राखेकी थिइन ।
अध्यक्ष प्रचण्डले एमसीसी नेपालमा राष्ट्रिय बहसको विषय बनिसकेको बताउँदै राष्ट्रिय सहमतिबाट मात्रै यसलाई अघि बढाउनुपर्ने आफ्नो पार्टीको धारणा रहेको बताएका थिए । प्रचण्डले एमसीसीको विषयमा नेपालका सबै राजनीतिक दलहरूबीच सहमति बनाएर अगाडि बढ्न सकिने बताएको उनको सचिवालयले जनाएको छ । प्रचण्डले देशको अग्रगमनको संवाहक वर्तमान गठबन्धनलाई बलियो बनाउनु अहिलको प्रमुख प्राथमिकता रहेको पनि बताएका थिए ।
उपाध्यक्ष सुमारले बिहीबार नै एकीकृत समाजवादीका अध्यक्ष माधवकुमार नेपाल, जनता समाजवादीका अध्यक्षद्वय बाबुराम भट्टराई र उपेन्द्र यादवसँग पनि भेट गरेकी थिइन् ।
सुमारले आजै प्रधानमन्त्री शेरबहादुर देउवालाई भेट गर्दैछिन् । यस्तै अर्थमन्त्री जनार्दन शर्मा र उर्जामन्त्री पम्फा भुसाललाई पनि भेट्ने कार्यक्रम छ ।
प्रतिक्रिया