एमाले संसदीय दलको बैठक जारी

काठमाडौं । नेकपा एमाले संसदीय दलको बैठक बसिरहेकोछ ।

संसद भवन नयाँ वानेश्वरस्थित ल्होत्से हलमा बसिरहेको बैठकमा संसदमा प्रभावकारी भूमिका कसरी खेल्ने भन्नेबारे छलफल भैरहेको छ ।

यही भदौ २३ गतेबाट सुरु भएको संघीय संसदको अधिवेशनको सुरुकै दिनदेखि एमालेले सभामुख अग्निप्रसाद सापकोटाको विरुद्धमा रोष्टम घेराउ र नारावाजी गर्दै आइरहेको छ ।

आफ्नो पार्टी फुटाउन मतियारको भूमिका निर्वाह गरेको भन्दै एमालेका सांसदहरुले सभामुख विरुद्ध चर्का नारावाजी गर्दै आएका छन् ।

सभामुख सापकोटा सत्ताधारी दलको कार्यकर्ता बनेर एमाले विरुद्ध लागेको भन्दै उनले संसद चलाउन नसकेको आरोप एमालेले लगाइरहेको छ । आज पनि एमालेले सदन अवरुद्ध गर्ने जनाएको छ ।

संसदीय दलको बैठकमा संसदभित्र कसरी प्रस्तुत हुने भन्नेमा संसदीय दलका नेता एवं पार्टी अध्यक्ष केपी शर्मा ओलीले निर्देशन दिँदैछन् ।
शुक्रबारको बैठकमा एमाले सांसदहरुले प्रधानमन्त्री र गृहमन्त्रीको माइक थुतेर सभामुखलाई प्रहार गर्न प्रयत्न गरेका थिए ।