बुटवल । नेकपा एमालेका उप–महासचिव विष्णु पौडेलले एमालेलाई विभाजित गर्ने प्रयास गरे पनि यसलाई आफूहरुले सफल हुन नदिने बताएका छन् । विगतमा पनि एमाले विभाजन गर्ने प्रयास असफल भएको बताउँदै उपमहासचिव पौडेलले विभाजनका कुनै पनि प्रयासहरु रुपन्देहीमा काम नलाग्ने दाबी गरे ।
नेकपा एमाले जिल्ला कमिटी रुपन्देहीले आज बुटवलमा आयोजना गरेको अगुवा कार्यकता भेलालाई सम्बोधन गर्दै उपमहासचिव पौडेलले नेकपा एमाले विभाजित नभई केही स्वार्थी र महत्वकांक्षी तत्वहरु छुट्टिएको बताए । केही समय पार्टी भित्र स्वार्थकेन्द्रित लडाई भएको उल्लेख गर्दै उनले माधवकुमार नेपालले आफ्नै पार्टीको सरकारलाई ढालेर नेपाली काँग्रेसको नेतृत्वमा सरकार बनाउन आत्मघाति काम गरेको आरोप लगाए । नेकपा (एकीकृत समाजवादी) का बारेमा धेरै टिप्पणी र चिन्ता गर्नु नपर्ने उल्लेख गरे सो पार्टीमा केही झुण्डहरु लागेको भने स्विकार गरे ।
एक्लै चुनाव लड्ने क्षमता प्रचण्ड माधव र कांग्रेसमा नरहेको भन्दै उनले सबै मिलेर बनेको गठबन्धनलाई परास्त गरिने र माधव नेपालको पार्टीले एक सिट जित्नु त परै जावस्, कुनै एक क्षेत्रमा जमानत पनि जोगाउन नसक्ने दावी गरे ।
नेता पौडेलले केही महिनाका लागि नेकपा एमाले प्रतिपक्षमा भए पनि छिट्टै बहुमतका साथ फेरी सरकारमा जाने बताए । नेपाली काँग्रेसका सभापति तथा प्रधानमन्त्री शेरबहादुर देउवा नेतृत्वको सरकारले २ महिनासम्म पनि मन्त्रिपरिषद विस्तार गर्न नसकेको भन्दै देउवा सरकारलाई तालातुली सरकारको संज्ञा दिए ।
वर्तमान सरकारले आलोचनात्मक कदम बाहेक केही गर्न नसकेको टिप्पणी गर्दै उनले देउवा नेतृत्वको सरकार जनताप्रति जिम्मेवार नभएको उल्लेख गरे ।
प्रतिक्रिया