काठमाडौं । प्रमुख प्रतिपक्षी दल नेकपा एमालेका सांसदहरुको चर्को नारावाजी र रोष्टम घेराउका बीच प्रतिनिधिसभाबाट विनियोजन विधेयक पारित भएको छ । एमालेको नारावाजीका बीच सभामुख अग्निप्रसाद सापकोटाले बहुमतले बजेट पारित भएको बताए ।
प्रतिनिधिसभाको आजको बैठकमा अर्थमन्त्री जनार्दन शर्माले पेश गरेको विनियोजन विधेयक बहुमतले पारित भएको हो । यससँगे २०७८/०७९ को बजेट पारित भएको छ । बजेट पारित भएसँगै अब सरकारलाई खर्च गर्ने बाटो खुलेको छ । गत भदौ ३० गते अघिल्लो आर्थिक अध्यादेशको समय सकिएको थियो । त्यससँगै सरकारलाई धुकुटीबाट खर्च गर्न बन्देज लागेको थियो ।
विनियोजन विधेयकमाथिको छलफलमा उठेका प्रश्नको जवाफ दिँदै अर्थमन्त्री शर्माले पूर्ववर्ती सरकारले ल्याएको बजेटमा तीन प्रतिशत बजेट मात्रै हेरफेर गरिएको तथा राष्ट्रहित र जनआकाङ्क्षालाई प्राथमिकतामा राखेर बजेट व्यवस्था गरिएको बताएका थिए ।
प्रतिनिधिसभाबाट पारित विनियोजन विधेयक राष्ट्रियसभामा जानेछ । राष्ट्रियसभाले पारित गरेपछि विधेयक कार्यान्वयनमा आउनेछ ।
अर्थमन्त्री शर्माले गत भदौ २५ गते चालू आर्थिक वर्षका लागि अघिल्लो अर्थमन्त्री विष्णु पौडेलले ल्याएको बजेटलाई संशोधन गर्दै १६ खर्ब ३२ अर्ब ८३ करोड रुपैयाँको बजेट पेस गरेका थिए ।
प्रतिक्रिया