काठमाडौं । नेकपा माओवादी केन्द्रले वडादेखि केन्द्रसम्म निर्वाचनमार्फत नेतृत्व चयन गर्नेभएको छ ।
माओवादीले वडादेखि केन्द्रीय समिति सदस्यसम्मको नेतृत्व निर्वाचनमार्फत चुनिएर आउने गरी कार्यविधि बनाएको छ । आगामी पुस ११ देखि १३ गतेसम्म राष्ट्रिय सम्मेलन गर्ने निर्णय गरेको माओवादी केन्द्रले नेतृत्व चयनको कार्यविधि बनाएको हो ।
वडा, निर्वाचन क्षेत्र (प्रदश र संघ), जिल्ला, प्रदेश र केन्द्रीय समितिसहित सबै कमिटीको नेतृत्व निर्वाचनबाट चुनिएर आउनुपर्ने गरी कार्यविधि बनाइएको माओवादी केन्द्रीय कार्यालय इन्चार्ज वर्षमान पुनले जानकारी दिए । राष्ट्रिय सम्मेलन अघि नै तल्ला कमिटीको नेतृत्व चयन भैसक्ने नेता पुनले बताए । यसरी नेतृत्व चयन हुँदा २ लाख ८५ हजार जना चुनिनेछन् ।
माओवादीले निर्वाचन कार्यविधिमा पार्टी अध्यक्ष र पदाधिकारीको चयन पनि निर्वाचनबाटै गर्ने उल्लेख गरेको छ । यद्यपी, माओवादीभित्र अझै लामो समय अध्यक्ष प्रचण्डको विकल्पको कुनै सम्भावना देखिँदैन । प्रचण्ड स्वयंले नेतृत्वबाट पछि हट्ने निर्णय नगरेसम्म उनको विकल्पबारे माओवादीका नेताहरुले कुनै सोचाईसम्म पनि बनाएका छैनन ।
सोमबार निर्वाचन समितिको भर्चुअल अभिमुखिकरण बैठक बसेको थियो । सो बैठकलाई सम्बोधन गर्दै अध्यक्ष प्रचण्डले सबै तहको नेतृत्व निर्वाचन प्रक्रियाबाट चयन हुने जानकारी गराउँदै त्यसैअनुसार तयारीमा जुट्न मातहत कमिटीलाई निर्देशन दिएका थिए। सो बैठकमा १ सय ८० केन्द्रीय सदस्य, ७ भौगोलिक र ३ गैरभौगोलिक गरी १० प्रदेशका प्रदेश निर्वाचन समितिका ५५ जना सहभागी थिए ।
बैठकमा निर्वाचन नियमावली, कार्यविधि र आचारसंहिताबारे केन्द्रीय निर्वाचन आयोगका अध्यक्ष विष्णुपुकार श्रेष्ठले प्रशिक्षण दिएका थिए।
प्रतिक्रिया