काठमाडौं । साढे ३३ किलो सुन तस्करी प्रकरणमा गोरे भनिने चुडामणि उप्रेतीसहित आठ जनालाई सजायँ भएको छ ।
जिल्ला अदालत मोरङले मंगलबार गोरेसहित आठ जनालाई दोषी ठहर गर्दै जन्मकैदको सजायँ सुनाएको हो । अदालतले ४८ जनालाई सफाइ दिएको छ। आरोपित सबै प्रहरीले सफाइ पाएका छन् ।
भरिया सनम शाक्यको हत्यामा संलग्न गोरेका समुहका ८ जना दोषी ठहर भएका हुन् । जन्मकैदको सजाय पाउनेमा गोरेसहित टेकराज मल्ल ठकुरी, लाक्पा शेर्पा, मोहन काफ्ले, नरेन्द्र कार्की र भोजराज भण्डारी रहेको अदालतका स्रेस्तेदार टिकेन्द्रवीरजंग राणाले जानकारी दिएका छन्। यस्तै, भारतीय नागरिक राजन कुमारलाई तीन वर्ष र माधव भनिने मदन घिमिरेलाई छ महिना कैद सजायको फैसला भएको छ । २१ जना फरार प्रतिवादीको मुद्दा मुल्तबीमा राखिएको छ ।
मुद्दाका आरोपित सबै प्रहरीले सफाई पाएका छन् । नेपाल प्रहरीका पूर्वडिआइजी गोविन्दप्रसाद निरौला, एसएसपी श्यामबहादुर खत्री, दिवेश लोहनी, डिएसपीहरू सञ्जयबहादुर राउत, प्रजित केसी, सई बालकृष्ण सञ्जेललगायतले सफाइ पाएका हुन् ।
२०७४ माघ अन्तिम साता यूएईबाट त्रिभुवन अन्तर्राष्ट्रिय विमास्थल हुँदै साढे ३३ किलो तस्करीको सुन नेपाल भित्र्याइएको थियो । तर सो सुन सम्बन्धित व्यक्तिकोमा नपुगी बीचैमा गायब गरिएको थियो । पछि, मोरङ उर्लाबारीका सनम शाक्यको हत्यापछि सुन हराएको पुष्टि भएको थियो । शाक्य सुनका भरिया थिए ।
प्रतिक्रिया