काठमाडौं । नेपाल सेनाले आफ्ना सैनिक र तिनमा आश्रित परिवारजनलाई दसैँमा घर जानका लागि हेलिकोप्टरबाट सेवा सम्मको सुबिधा दिने घोषणा गरेको छ ।
सेनाको कल्याणकारी सुविधाअन्तर्गत घर बिदामा जाने बहालवाला सैनिक र उनीहरुका परिवारलाई सडक यातायात रहेको स्थानमा यातायात खर्च र सडक यातायात नभएको स्थानमा हेलिकोप्टर सम्मको सुविधा दिने घोषणा गरेको हो । प्रधान सेनापति प्रभुराम शर्माले आफ्नो पद बहालीसँगै सकल दर्जा र आश्रित परिवारलाई कल्याणकारी सुविधा थप गर्ने घोषणा अनुसार सो सुविधा उपलब्ध गराईन लागेको नेपाली सेनाको जनसम्पर्क तथा सूचना निर्देशनालयले जनाएको छ ।
असोज १८ देखि असोज २९ (दशैका दिन) सम्म कायम रहनेगरि सैनिक कर्मचारी र सेनाका आश्रित परिवारलाई गाडी र हेलिकप्टरमा पठाउन शुरु गरिएको सैन्य प्रवक्ता (सहायकरथी) सन्तोष बल्लभ पौड्यालले बताए । जंगी अड्डाले सडकको सहज पहुँच नपुगेका डोल्पा र हुम्ला जस्ता जिल्लामा हेलिकप्टरको माध्यमबाट सेनाका आश्रित परिवारलाई घर पठाएको जनाएको छ ।
प्रतिक्रिया