बेवारिसे बम विस्फोट हुँदा २ जना घाइते

सुर्खेत । सुर्खेतको वीरेन्द्रनगर नगरपालिका-७ स्थित कटकुवा सामुदायिक बनमा शनिबार बिहान वेवारिसे विस्फोटक पदार्थ विस्फोट हुँदा २ जना घाइते भएका छन् । विस्फोटबाट सोही नगरपालिका-७ डेरा गरी बस्ने दैलेख गुराँस गाउँपालिका-६ जहरेमाझ घर भएकी २१ वर्षीया लिला नेपाली र उनकै भाइ १४ वर्षीय नरेश परियार घाइते भएको प्रहरीले जनाएको छ ।

प्रत्येक शनिबार सर्वसाधारणका लागि खोल्ने गरिएको उक्त बनमा घाँस काटीरहेको अवस्थामा एक्कासि विस्फोट हुँदा उनीहरु घाइते भएका थिए । उनीहरुलाई उपचारको लागि देउती नर्सिङ होम सुर्खेत लगिएको छ । प्रहरीका अनुसार घाइतेमध्ये लिलाको अवस्था सामान्य र नरेशको अवस्था बोल्न सक्ने रहेको छ ।

नेपाली सेनासँगको समन्वयमा जिल्ला प्रहरी कार्यालय सुर्खेतबाट खटिएको प्रहरीले यस सम्बन्धमा आवश्यक अनुसन्धान गरिरहेको सुर्खेत प्रहरीले जनाएको छ ।