काठमाडौं । नेपाल बार एसोसिएसनको सल्लाहकार समितिले प्रधानन्यायाधीश चोलेन्द्रशमशेर राणाको राजीनामा माग्न बार कार्यसमितिलाई सुझाव दिएको छ ।
मंगलबार बसेको सल्लाहकार समितिको बैठकले प्रधानन्यायाधीसको राजनीनामा माग्न र उनले राजीनामा नदिए आन्दोलन गर्न कार्यसमितिलाई सुझाव दिएको हो ।
बारका पूर्वअध्यक्षहरु र समहासचिवहरु एवं उपत्यकाका बरिष्ठ अधिवक्ताहरू सल्लाहकार समितिका ३७ जना सदस्यहरुको उपस्थितिमा भएको छलफलमा प्रधानन्यायाधीसको राजीनामा माग्ने विषयमा एक जनाबाहेक सबैले समर्थन जनाएका थिए । बार पूर्वअध्यक्ष शेरबहादुर केसीले मात्र प्रधानन्यायाधीसको राजीनामा माग्न नहुने धारणा राखेका थिए । यस्तै पूर्वमहान्यायाधिवक्ता रमेश बडालले प्रधानन्यायाधीसको मात्र नभएर प्रतिनिधिसभा विघटन विरुद्ध फैसला गर्ने पाँचै न्यायाधीसको राजीनामा माग्नुपर्ने जिकिर गरेका थिए ।
वरिष्ठ अधिवक्ताहरु हरिहर दाहाल, शम्भू थापा, रमण श्रेष्ठ, रामनाथ मैनाली, कुमार शर्मा, मुक्ति प्रधान, कृष्ण सापकोटा, सुरेन्द्र महतो, टीकाराम भट्टराई लगायतले प्रधानन्यायाधीसले राजीनामा गर्नुको विकल्प नभएको बताएका थिए ।
बैठकपछि संचारकर्मीसँग कुरा गर्दै वरिष्ठ अधिवक्ता शम्भु थापाले बुधबारदेखि कानून व्यवसायीहरुले सर्वोच्च अदालतमा बहस नगर्ने बताए । थापाले प्रधानन्यायाधीश चोलेन्द्रशमशेर जबराले गरेका गलत कामको छानबिन हुनुपर्ने आफूहरुको माग रहेको बताए ।
प्रतिक्रिया