बुटवल । पेट्रोलियम पदार्थको मूल्यवृद्धि विरुद्ध बुटवलमा एमाले निकट विद्यार्थी संगठन अनेरास्ववियु रुपन्देहीले १ घन्टा चक्काजाम गरेका छन् । नेपाल आयल निगमले बिहीबार रातिदेखि लागू हुनेगरी पेट्रोलियम पदार्थ तथा ग्यासमा गरेको मूल्यवृद्धिको विरोध गर्दै फिर्ता गर्ने मागसहित अनेरास्ववियु शुक्रबार बिहानै सडकमा उत्रिएका हुन ।
निगमले डिजेल, पेट्रोल र मट्टितेलको भाउ प्रतिलिटर रु ३ बढाएको छ । यससँगै पेट्रोलको भाउ प्रतिलिटर १३६ पुगेको छ भने मट्टीतेल र डिजेलको भाउ ११९ रुपैयाँ पुगेको छ । यसअघि निगमले गत कात्तिक १२ गते पनि डिजेल, पेट्रोल र मट्टितेलको मूल्य बढाएको थियो ।
इन्धनको मूल्य बढाएर सरकारले जनताको ढाड सेक्ने काम गरेको भन्दै एमाले निकट अनेरास्वबियु रुपन्देहीले मूल्यवृद्धि तुरुन्त फिर्ताको माग गरेको अनेरास्ववियु रुपन्देहीका अध्यक्ष शेषकान्त पोखरेलले जानकारी दिए । विरोधस्वरुप बिहान ९ बजेदेखि १० बजेसम्म १ घन्टा राजमार्ग बन्द गरेको अनेरास्ववियु रुपन्देहीका सचिव तथा प्रचार बिभाग प्रमुख प्रकाश पराजुलीले जानकारी दिए ।
प्रतिक्रिया