कपिलवस्तुमा हैजा विरुद्ध १० दिने खोप अभियान सञ्चालन गरिँदै

बुटवल । कपिलवस्तुमा फैलिएको हैजा नियन्त्रणका लागि १० दिने खोप अभियान सञ्चालन गरिने भएको छ । लुम्बिनी प्रदेशको स्वास्थ्य जनसंख्या तथा परिवारवार कल्याण मन्त्रालयले बिहीबार बुटवलमा पत्रकार सम्मेलन गर्दै मंसिर ५ देखि १२ गतेसम्म १० दिन अभियानका रुपमा हैजा विरुद्धको खोप सञ्चालन गरिने जानकारी दिएको हो । मन्त्रालयले डब्लुएचओबाट प्रमाणित स्यानकोल नामक मुखबाट खुवाइने भ्याक्सिन दिईने निर्णय भएको जनाएको छ ।

कपिलवस्तुका कृष्णनगर, शिवराज, महाराजगन्ज, विजयनगर नगरपालिका र यशोधरा गाउँपालिकामा असोज १८ देखि फैलिएको झाडा पखालामा हैजाको जिवाणु भेटिएपछि शतर्कता अपनाइएको हो । हैजाबाट अहिलेसम्म १ हजार ४ सय ४९ जना संक्रमित भएका छन् । संक्रमणबाट ६ जनाको मृत्यु भएको छ ।

मन्त्रालयका अनुसार उक्त खोप २ देखि ४ हप्ताको फरकमा २ मात्रा लगाउनुपर्ने छ । दुवै मात्रा पाएका व्यक्तिमा ७ देखि १० दिनबाट उक्त खोपले काम गर्न सक्ने बताइएको छ । कपिलवस्तुमा भने ३ हप्ताको फरकमा मंसिर २६ देखि पुस ४ सम्म दोस्रो मात्राको खोप अभियान सञ्चालन गर्ने मन्त्रालयको तयारी छ ।

कपिलवस्तुमा हैजा फैलिएका पाँचवटै स्थानीय तहका एक वर्षमाथिका सबै व्यक्तिलाई खोप लगाइने मन्त्रालयका सचिव डा. विकास देवकोटाले जानकारी दिए ।

कपिलवस्तुमा असोज १८ देखि हैजा फैलिएको थियो । असोज २२ मा परीक्षणमार्फत् उक्त झाडापखला हैजा हो भन्ने प्रमाणित भएको र पानीको स्रोत फोहोर भएका कारण हैजा फैलिएको अनुमान गरिएको थियो ।

मन्त्रालयका स्वास्थ्य अधिकृत शैलेन्द्र पाण्डेले कपिलवस्तुमा पानी शुद्ध गर्न क्लोरीन ट्याबलेट वितरण, थप स्वास्थ्यकर्मी परिचालन र व्यक्तिगत सरसफाईका लागि चेतनामूलक कार्यक्रम संचालन गरिएको बताए । कपिलवस्तुमा जस्तै प्रकृतिको हैजा केहिवर्ष पहिले नेपालगन्जमा फैलँदा समेत यही बिधि अपनाएर नियन्त्रणमा लिइएको मन्त्रालयले स्मरण गरेको छ ।