देश ‘प्रयोगशाला’ बन्दै गएको पूर्वराजा ज्ञानेन्द्रको टिप्पणी

काठमाडौं । पूर्वराजा ज्ञानेन्द्र शाहले देशको वर्तमान अवस्थाप्रति चिन्ता व्यक्त गर्दै नेपाल प्रयोगशालाजस्तै बन्दै गएको टिप्पणी गरेका छन् ।

नयाँ वर्षको पूर्वसन्ध्यामा शुभकामना सन्देश जारी गर्दै उनले राजनीति, राज्यपद्धति र शासन प्रणालीमा भएका बारम्बारका परिवर्तनले अपेक्षित प्रगति नआएको बताएका हुन् । उनका अनुसार परिवर्तनहरू कोरा मात्र सीमित हुँदा राष्ट्रको समग्र विकास पछाडि परेको छ ।

“सधैँ प्रयोग, अभ्यास र विकल्पको खोजीमा लाग्दा देश प्रयोगशाला मात्र बन्यो,” उनले सन्देशमा उल्लेख गरेका छन् ।

पूर्वराजा शाहले विगतका वर्षहरूमा अपेक्षित विकास हुन नसकेको र जनमानसमा निराशा बढेको पनि औँल्याएका छन् । यद्यपि, उनले राजनीति र राज्य सञ्चालनमा युवाहरूको बढ्दो सहभागितालाई सकारात्मक रूपमा लिँदै यसले देशलाई नयाँ दिशा दिन सक्ने विश्वास व्यक्त गरेका छन् ।

देश विभिन्न समस्याले ग्रस्त रहेको उल्लेख गर्दै उनले आर्थिक अवस्था सुधार, छिमेकी तथा अन्तर्राष्ट्रिय सम्बन्ध सुदृढ बनाउनेतर्फ ध्यान केन्द्रित गर्नुपर्ने बताए ।

उनले आन्तरिक सुरक्षा प्रणाली कमजोर भएको उल्लेख गर्दै नागरिकलाई शारीरिक, मानसिक तथा भौतिक सुरक्षा सुनिश्चित गर्न राज्य गम्भीर हुनुपर्नेमा जोड दिएका छन् । साथै, निषेध, द्वन्द्व र विभाजनको राजनीतिले राष्ट्रलाई कमजोर बनाउने भन्दै आपसी सद्भाव र सहकार्य आवश्यक रहेको उनले बताएका छन् ।