बुटवल । काँग्रेस महाधिवेशनको सन्दर्भमा रुपन्देहीको प्रदेश ३(क) को मतगणना स्थलमा आक्रमणमा परेका घाइते नेताका समर्थकहरुले अस्पतालको बेडमै पत्रकार सम्मेलन गरेका छन् । उनीहरुले आन्तरिक लोकतन्त्रको अभ्यासका क्रममा मण्डले शैलीमा आक्रमण भएको भन्दै घटनाको निन्दा समेत गरेका छन् ।
पत्रकार सम्मेलनमा बोल्दै प्रदेश (क)का उम्मेदवार पुरण श्रेष्ठले गृहमन्त्री बालकृष्ण खाणको भाई रामकृष्ण खाणको निर्देशनमा आक्रमण भएको आरोप लगाए । उनले खाणको निर्देशनमा तरुण दलका रुपन्देही अध्यक्ष सोम बहादुर गुरुङको नेतृत्वमा आएको टोलिले काँग्रेस नेता शैलेस पन्तमाथि सांघातिक आक्रमण भएको बताएका छन् । सत्ता र शक्तिको आडमा गुण्डा परिचालन गरेर आफ्नै पार्टीको कार्यकर्तामाथि सांघातिक आक्रमण भएको भन्दै श्रेष्ठले मतगणना स्थलको सुरक्षा दिन नसक्ने गृह प्रशासनको समेत भत्र्सना गरेका छन् ।
सिद्धार्थनगरको भैरहवा स्थित प्रदेश (क)को मतगणना स्थलमा राती काँग्रेसका देउवा पक्षधर युवाहरु पुगेर जेनरेटर बन्द गर्नुका साथै प्रदेश सचिव पदका उम्मेदवार शैलेस पन्त सहित ५ जना कार्यकर्ताहरु माथि आक्रमण गरेका थिए । घाइते ४ जनाको भिम अस्पतालमा र गम्भीर घाइते भएका पन्तको लुम्बिनी प्रादेशिक अस्पतालमा उपचार भईरहेको छ । रुपन्देहीमा रामचन्द्र पौडेल पक्षीय नेताहरुले आफ्नो पक्षका नेताहरुले आन्तरिक निर्वाचनमा जित्ने निश्चित भएपछि गृहमन्त्री खाणको आडमा आक्रमण भएको आरोप लगाएका छन् ।
उता काँग्रेस रुपन्देहीका सचिव एवम गृहमन्त्रीको भाई रामकृष्ण खाणले घटना नियोजित नभएको बताएका छन् । घाइते पन्तलाई भेट्न अस्पताल पुगेको खाणले मतगणना स्थलमा नभई बाहिर झडप भएको बताउँदै त्यसमा कुनै नियोजित योजना नभएको स्पष्ट पारेका छन् । उनले गृहमन्त्रीको नाम जोड्न आवश्यक नरहेको बताउँदै घटनाका बारेमा बसेर निकास दिन सकिने बताएका छन् ।
प्रतिक्रिया