काँग्रेस १४ औं महाधिवेशन : घाइते कुमारलाई काठमाडौं रिफर गरियो

खबर कुरा
७ मंसिर २०७८, मंगलवार
                 

बुटवल । नेपाली काँग्रेसको १४ औं महाधिवेशन अन्तर्गत क्षेत्रिय निर्वाचनको रुपन्देही क्षेत्र नम्बर २ को मतगणना स्थलमा दुई समूहबीच भएको कुटाकुटमा घाइते भएका नेपाली काङ्ग्रेस महाधिवेशन प्रतिनिधिका उमेदवार दीर्घबहादुर केसी (कुमार)लाई थप उपचारको लागि काठमाडौं पठाइएको छ।

रूपन्देही क्षेत्र २ को सोमबार सम्पन्न निर्वाचनको मतगणना भइरहेको अवस्थामा दुई समूहबीच भनाभनपछि केसीमाथि काँग्रेस संस्थापन पक्षका प्रस्नन कोईरालाले मुक्का प्रहार गरेको बताइएको छ । कोईरालाको मुक्का प्रहारबाट केसीको आँठ फुटेको र टाउकोमा समेत चोट लागेको घटनास्थलमा रहेका एक काँग्रेस कार्यकर्ताले बताए । घाइते केसीलाई लुम्बिनी प्रादेशिक अस्पतालमा प्राथमिक उपचार गरिएको र अस्पतालले थप उपचारका लागि काठमाडौ रिफर गरेको केसीसँगै अस्पताल पुगेका गोपाल ज्ञवालीले जानकारी दिए ।

केसी पौडेल समूहबाट महाधिवेशन प्रतिनिधि उम्मेदवार रहेका थिए। आक्रमणबाट उनको टाउको र मुखमा चोट लागेको छ। बढी रगत बगेको र मुखभित्र र टाउकोमा समेत चोट देखिएकाले काठमाडौं रिरफर भएको केसीसँगै काठमाडौं हिँडेका शंकर मल्लाहले बताए । यती एअरलायन्सको बिमानबाट काठमाडौं लगिएको मल्लाहले बताए ।

मतगणना कार्य सकिनै लाग्दा विवाद उत्पन्न भएपछि अहिले मतगणना कार्य रोकिएको छ। निर्वाचनमा पौडेल पक्षिय उम्मेदवार हरि लम्सालले अग्रता लिएसँगै मतगणना स्थलमा विवाद सुरु भएको थियो ।

कूल खसेको ६ सय ६९ मतमध्ये ६ सय मत गणना भइसकेकोले मतगणना कार्यलाई सुचारू गर्न दुबै पक्ष छलफलमा रहेको सभापतिका उम्मेदवार हरि लम्सालले बताए ।

 

यसमा तपाइको मत

Your email address will not be published. Required fields are marked *


*