सौराहा । एमालेको १०औं महाधिवेशनमा अध्यक्ष पदको उम्मेदवार बन्न खोजेका भीम रावलका समर्थकहरुले उनको पक्षमा पर्चा वितरण गरेका छन् ।
बन्दसत्र हल बाहिर भीम रावलको तस्बिरसहितको सानो पुस्तिका वितरण गरिएको छ । महाधिवेशनस्थलमा भीम रावलले अध्यक्षमा उठ्नुपर्ने कारणसहितको पुस्तिका उनी निकट कार्यकर्ताले महाधिवेशन प्रतिनिधिलाई वितरण गरेका हुन् ।
पदाधिकारी वा केन्द्रीय सदस्यका आकांक्षी कसैले पनि पर्चा पम्प्लेट बाँड्न नपाउने गरी आचार संहिता जारी गरिएको थियो । सोही कारण देखाउँदै स्वयं सेवकहरुले भने पर्चा वितरणमा रोक लगाएका छन् ।
रावलले अध्यक्षमा उम्मेदवारी दिने घोषणा गरिसकेका छन् । तर, रावलले अध्यक्षमा उठ्ने बताएपनि अहिलेसम्म निर्वाचन समितिलाई मतदान प्रक्रियाबारे कुनै जानकारी गराइएको छैन ।
अध्यक्ष केपी ओली भने सर्वसम्मतिका नाममा एमालेको नयाँ केन्द्रीय कमिटी घोषणा गर्ने तयारीमा छन् ।
प्रतिक्रिया