आफ्नै प्रस्तावलाई सर्वसम्मत बनाउन ओलीको सक्रियता तिब्र, पूर्व माओवादी नेताहरुसँग गोप्य भेटवार्ता

काठमाडौं । निर्वाचनलाई निषेध गर्दै आफ्नो प्रस्तावमा सहमति गराउने प्रयासमा जुटेका एमाले अध्यक्ष केपी शर्मा ओलीले पूर्व माओवादी पृष्ठभूमिका एमाले नेताहरुसँग छलफल गरेका छन् । आफ्नै प्रस्तावलाई सर्वसम्मत रुप दिन नेतृत्व चयनका लागि छलफलमा जुटेका ओली आइतबार लेखराज भट्ट, टोपबहादुर रायमाझी, प्रभु साह लगायतका पूर्व माओवादी नेतासँग छलफल गरेका हुन् ।

आफू बसेकै रिसोर्टमा उनीलाई बोलाएर ओलीले नयाँ नेतृत्व चयन प्रक्रिया र उनीहरुका आकांक्षाबारे चासो राखेको एमाले स्रोतले दाबी गरेको छ । ओलीले सहमतिबाटै नेतृत्व चयन गर्ने प्रयासस्वरुप बिहानैदेखि एमालेका वहालवाला नेताहरु र बिभिन्न अवस्थामा एमालेमा भित्रिएका नेताहरुसँगको भेटवार्तालाई तिब्र पारेका छन् ।

पूर्व माओवादी नेताहरुले पनि आफूहरु सहमतिबाटै नेतृत्व चयन होस् भन्ने पक्षमा रहेको र आफ्नो पक्षलाई पदाधिकारीमा कम्तिमा ३ वटा स्थान दिनुपर्ने माग ओली समक्ष राखेको स्रोतको दाबी छ ।