एमाले महाधिवेशन : साँझ ७ बजेपछि बन्दसत्र सुरु गर्ने तयारी

चितवन । नेकपा एमालेको दशौं महाधिवेशनको तेस्रो दिन आइतबार दिनभरी बन्दसत्र सुरु हुन सकेन । अध्यक्ष केपी ओलीले प्रस्ताव गरेका पदाधिकारी तथा केन्द्रीय सदस्यहरुलाई सर्वसम्मत बनाउने अभ्यास गरेरै आइतबारको दिन बितेको छ । आइतबार बिहानैदेखि सहमतिको प्रयासका लागि भन्दै एमाले अध्यक्ष केपी शर्मा ओलीले आफू बसेकै होटलमा पार्टीका विभिन्न नेताहरुसँग छलफल गरेका कारण बन्दसत्र सुरु हुन नसकेको हो । शनिबार साँझबाटै निर्वाचन प्रक्रिया सुरु गर्ने भनिएपनि पूर्व निर्धारित निर्वाचन कार्यक्रम ओलीको निर्देशनमा रोकिएको एमाले स्रोतले जनाएको छ ।

झण्डै २ महिना पहिले ६ हजार पार्टी सदस्यहरुले बनाएको विधान विपरित अध्यक्ष बन्न तम्सिएका ओली र विधान विपरित जनाभावी पदाधिकारी र केन्दीय सदस्यहरु थप गरेर महाधिवेशन अगाडि बढाउने प्रयासका कारण बन्दसत्र लम्बिएको स्रोतको दाबी छ ।

ओलीले दशौं महाधिवेशनबाट निर्वाचित हुने पदाधिकारी र केन्द्रीय समिति सदस्यको सूचीसमेत तयार पारिसकेको र ओलीले तयार पारेको सूचीलाई बन्दसत्रबाट ताली बजाएर अनुमोदन गराउँदै महाधिवेशनको अन्त्य गर्ने तयारीमा ओली रहेको बताइएको छ ।

साँझ ७ बजेबाट बन्दसत्र सुरु गर्ने तयारीमा ओली रहेको पनि स्रोतले बतायो ।