काठमाडौं । नेकपा एमालेको नेतृत्व चयनका लागि निकै ढिलो गरी बिहान ४ बजेबाट मात्र मतदान सुरु भएको छ ।
चितवनको सौराहामा जारी १०औं महाधिवेशनको बन्द सत्रअन्तर्गत अध्यक्ष, उपाध्यक्ष र सचिव पदमा मतदान भैरहेको हो ।
बिहान ४ बजेबाट सुरु भएको चुनावमा पहिलो मतदान उपमहासचिवमा निर्विरोध भएका प्रदीप ज्ञवालीले गरेका छन् । अध्यक्षका उम्मेदवारद्धय केपी शर्मा ओली,भीम रावलका साथै अरु नेताहरुले पनि सुरुमै मतदान गरे ।
मतदानपछि संचारकर्मीहरुसँग कुरा गर्दै अध्यक्षका उम्मेदवार भीम रावलले पार्टीको नीति र सिद्धान्तअनुसार चुनावले लोकतन्त्रलाई बलियो बनाउने दाबी गरे । उनले प्रतिनिधि चयनमै व्यापक गलत काम भएको आफुले पहिलेदेखि नै बताउँदै आएका कारण परिणामलाई सहज रुपमा लिने बताए ।
सुरुमा राति ९ बजेबाट मतदान गर्ने भनिएको थियो । तर पछि कार्यतालिका संशोधन गर्दै राति १० बजेपछि उम्मेदवारको अन्तिम नामावली प्रकाशित गर्ने र २ बजेबाट मतदान सुरु गर्ने भनिएको थियो । तर सो समयमा पनि मतदान हुन सकेन । जसका कारण प्रतिनिधिहरु रातभर अनिदो बस्न बाध्य भएका छने ।
निर्वाचन आयोगले जारी गरेको अन्तिम उम्मेदवार नामावलीअनुसार पदाधिकारीतर्फ अध्यक्ष, उपाध्यक्ष र सचिवमा निर्वाचन हुँदैछ।
प्रतिक्रिया