वैवाहिक अंगीकृत नागरिकताको सिफारिस वडा कार्यालयबाटै पाउनुपर्ने माग

खबर कुरा
१७ पुष २०७८, शनिबार
                 

भैरहवा । विवाह दर्ता र वैवाहिक अंगीकृत नागरिकताको सिफारिस गाउँपालिकाको (वडा कार्यालय) बाटै गर्न माग गर्दै लोकतान्त्रिक समाजवादी पार्टी (लोसपा) मायादेवी गाउँपालिका कार्यसमिति, रुपन्देहीले ज्ञापनपत्र बुझाएको छ ।

विवाह दर्ता र वैवाहिक अंगीकृत नागरिकताको सिफारिसको लागि अदालत पठाइ नागरिकलाई अनावश्यक दुःख दिने काम भएकोले गाउँपालिकाबाटै विवाह दर्ता गरी नागरिकताको सिफारिस गर्न लोसपाले माग गरेको छ ।

मायादेवी गाउँपालिकाका प्रमुख प्रशासकीय अधिकृत ऋषिराम पन्थीलाई ज्ञापनपत्र बुझाउँदै सम्पूर्ण वडा कार्यालयमा पत्राचार गरी पहिला जस्तै नै सिफारिस गरिदिन माग गरिएको लोसपा मायादेवी गाउँपालिका कार्यसमितिका अध्यक्ष सोभनाथ यादवले बताए ।

लोसपा रुपन्देहीका अध्यक्ष अजय वर्माले गाउँपालिकाले आफूहरुले उठाएको माग ७ दिनभित्र कार्यान्वयन नगरे पार्टीकोतर्फबाट गाउँपालिका कार्यालय घेराउसहित सशक्त आन्दोलन गर्न बाध्य हुने बताए । ‘जिल्लाका अन्य पालिकाबाटै विवाह दर्ता र वैवाहिक अंगीकृत नागरिकताको सिफारिस गरिएको छ, तर मायादेवीमा दुःख दिने काम भएको छ, ’उनले भने ।

ज्ञापनपत्र बुझाउन लोसपा केन्द्रीय कार्यकारिणी सदस्य निलम यादव, लुम्बिनी प्रदेश सदस्य रामु यादव, रुपन्देही जिल्ला अध्यक्ष अजय वर्मा, नेताहरु मोहनलाल यादव, रामअधारे यादव, शैलेन्द्र पाण्डे, सोभनाथ यादव गाउँपालिका कार्यालय पुगेका थिए ।

यसमा तपाइको मत

Your email address will not be published.


*