उपत्यकामा शुक्रबारबाट जोरबिजोर

काठमाडौं । एकैदिन ७ हजारका दरले उपत्यका भित्र कोरोना संक्रमण पुष्टि हुन थालेपछि स्थानीय प्रशासनले शुक्रबारबाट उपत्यकाका तीन वर्ट जिल्लामा जोर बिजोर प्रणाली लागु गर्ने भएको छ । उच्च गतिमा बढ्दै गएको कोरोना संक्रमण रोकथाम गर्ने उद्देश्यले काठमाडौं उपत्यकामा शुक्रबार राति १२ बजेदेखि जोरबिजोर प्रणाली लागू गरिने भएको हो ।

काठमाडौं, ललितपुर र भक्तपुरका प्रमुख जिल्ला अधिकारीहरुको आज बसेको संयुक्त बैठकले जोरबिजोर प्रणाली लागु गर्ने निर्णय गरेको हो । शुक्रबार राति १२ बजेदेखि सार्वजनिक र निजी सवारी साधनहरुमा जोर बिजोर प्रणाली लागू गर्ने निर्णय भएको ललितपुरका प्रमुख जिल्ला अधिकारी घनश्याम उपाध्यायले जानकारी दिए । उनले स्मार्ट लकडाउनको कार्यविधिअनुसार सार्वजनिक र निजी सवारी साधनहरुमा जोर बिजोर लागू गरिएको जानकारी दिए ।

प्रमुख जिल्ला अधिकारीहरुको निर्णय अनुसार शुक्रबार राति १२ बजेदेखि जोर गते जोर नम्बरका र बिजोर गते बिजोर नम्बरका सवारी साधन सन्चालन गर्नुपर्ने छ । जोरबिजोरको निर्णय दुई पांग्रे सवारी साधनहरुमा पनि लागू हुने बताइएको छ ।