बैतडीमा बस दुर्घटना, ८ जना घाइते

बैतडी । बैतडीमा आज बिहान बस दुर्घटना भएको छ । दुर्घटनामा आठ जना घाइते भएका छन् ।

पाटन–पञ्चेश्वर सडकखण्ड अन्तरगत मेलौली नगरपालिका २ रौतगाँउमा आज बिहान ६ बजे ना ७ ख २५७० नम्बरको बस दुर्घटना भएको हो । दुर्घटनामा आठ जना घाइते भएको जिल्ला प्रहरी कार्यालयले जनाएको छ ।

घाइते हुनेमा मेलौली नगरपालिका ६ का कमलापति भट्ट, मनिषा चन्द, दुर्गादत्त भट्ट, शिवनाथ गाउँपालिकाका शुशीला चन्द, जनक औजी, रामसिंह साउद, कञ्चनपुरको बेदकोट नगरपालिका दैजीका पूजा भट्ट र बाराका सिराज अन्सारी रहेका छन् ।

उनीहरुलाई उपचारको लागि डडेल्धुरा अस्पतालमा पठाइएको छ । ३२ यात्रु रहेको बसमा सवार अन्यको अवस्था सामान्य प्रहरीले जनाएको छ ।

महेन्द्रनगरबाट मेलौलीतर्फ गइरहेको पवनदुत यातायातको उक्त बस सडकबाट २० मिटर तल खसेको हो । बस चालक कञ्चनपुरको शुक्लाफाँटा नगरपालिका १ का विरेन्द्र लुहारलाई प्रहरीले नियन्त्रणमा लिएको छ ।