मौसम जानकारी : पश्चिम वायुको प्रभावले तीन दिन वर्षाको सम्भावना

काठमाडौं । पश्चिमी वायुको प्रभावले आगामी तीन दिन देशभर वर्षाको सम्भावना रहेको जल तथा मौसम विज्ञान विभागले जनाएको छ ।

विभागका अनुसार गएराति पश्चिम नेपालबाट प्रवेश गरेको पश्चिमी न्यूनचापीय प्रणालीको प्रभावले आज सुदूरपश्चिम, कर्णाली, लुम्बिनी र गण्डकी प्रदेशमा पूर्ण बदली हुने भएको छ । त्यस्तै, बागमती, मधेस र प्रदेश १ मा आंशिकदेखि सामान्य बदली रहने भएको छ ।

शुक्रबार देशैभरी सामान्यदेखि पूर्ण बदली रहने विभागले जनाएको छ । त्यस्तै, शनिबार देशभरी आंशिकदेखि सामान्य बदली रहने विभागको आकलन छ ।

पश्चिम वायुको प्रभावले आज सुदूरपश्चिम, कर्णाली र लुम्बिनी प्रदेशका धेरै स्थान तथा गण्डकी र बागमती प्रदेशका केही स्थानमा मेघ गर्जन र चटयाङसहित वर्षाको सम्भावना रहेको छ । त्यस्तै, उच्च पहाडी र हिमाली क्षेत्रमा हिमपातको सम्भावना रहेको छ ।