न्यायालयको समस्या समाधानमा प्रधानन्यायाधीशले निकास नदिएपछि महाअभियोग : प्रचण्ड

जनकपुरधाम । नेकपा माओवादी केन्द्रका अध्यक्ष पुष्पकमल दाहाल प्रचण्डले न्यायालयमा देखिएको समस्या समाधान गर्न प्रधानन्यायाधीश चोलेन्द्रशमशेर जबरा अनिच्छुक भएपछि उनी विरुद्ध महाअभियोग लगाएको बताएका छन् ।

आइतबार जनकपुरधाममा पत्रकारहरुसँग कुरा गर्दै अध्यक्ष प्रचण्डले न्याय क्षेत्रमा देखिएको अन्योल, अराजकता र बेथिति हटाउन प्रधानन्यायाधीश राणाले पहल नगरेपछि उनलाई हटाउन महाअभियोग लगाइएको बताएका हुन् । प्रचण्डले न्यायालयमा देखिएको समस्या समाधान गर्न उनले नै पहल गरून् भन्ने गठबन्धनको चाहना भए पनि उनले त्यसो नगरेको जिकिर गरे । ‘न्याय क्षेत्रमा देखिएका अन्योल, अराजकता र बेथितीको निकास प्रधानन्यायाधीशले दिनुपर्ने भए पनि उनले निकास नदिएपछि संवैधानिक बाटोबाट निकास दिन लागेको हो’, प्रचण्डले भने ।

प्रचण्डले न्यायालयको बेथितीका लागि मुख्य जिम्मेवार प्रधानन्यायाधीश नै हुनुपर्ने बताए। उनले भने, ‘झन् पछि झन् न्याय क्षेत्र विवादित हुने, अराजक हुने, झन् अन्योलग्रस्त हुने देखिएपछि एउटा वैधानिक, संवैधानिक र लोकतानित्रक बाटोबाट समस्याको निकास गर्ने भनेको महाअभियोग नै हुन्छ । त्यसमा गठबन्धनमा आम सहमति पनि भयो र हामीले त्यो दर्ता गर्‍यौं ।’

प्रचण्डले राणामाथि महाअभियोग लगाउने विषयमा सत्तारूढ गठबन्धनका सबै दलहरू सहमत भएको दाबी गरे । यसबाट गठबन्धनलाई अझ बलियो बन्ने उनले विश्वास व्यक्त गरे । ‘महाअभियोग लगाउनेमा सबैको सहमति छ। यसले गठबन्धनलाई अझ बलियो बनाउँछ,’ प्रचण्डले भने।