काठमाडौं । नेपाली कम्युनिष्ट पार्टी (नेकपा) का संयोजक पुष्पकमल दाहाल प्रचण्डले पूर्व प्रधानन्यायाधीश पक्राउ प्रकरणमा मुख खोलेका छन् । उनले पूर्व प्रधानन्यायाधीश चोलेन्द्र समसेर जवरालाई पक्राउ गरिएको प्रकरणलाई ‘छोरी पिटेर बुहारी तर्साउन खोजेको’ जस्तो नियत सरकारले देखाएको टिप्पणी गरेका छन् ।
सोमबार संघीय संसद् भवन सिंहदरबारमा सञ्चारकर्मीसँग कुरा गर्दै संयोजक प्रचण्डले ‘छोरी पिटेर बुहारी तर्साउन खोजेको’ जस्तो नियत सरकारको हो भने त्यो सरकारकै लागि घातक हुने र यसको मूल्य धेरै ठूलो चुकाउनुपर्ने बताए ।
उनले बिना कारण विशिष्ट व्यक्ति (भीआईपी) हरूलाई पक्राउ गर्ने क्रम जारी रहे सरकारले मूल्य धेरै ठूलो चुकाउनुपर्ने टिप्पणी गरे । यस्ता घटना नदोहोर्याउन उनले सरकारलाई आग्रह समेत गरे ।
सामान्य मानिसले पनि बुझ्ने खालको बहानाबाजी गर्दै सरकारबाट पूर्वप्रधानन्यायाधीशलाई सुरक्षा थ्रेट भनिएको उनको भनाइ थियो । प्रचण्डले साँच्चै ‘सुरक्षा थ्रेट’ थियो भने पक्राउ गर्नुको साटो घरमै सुरक्षाकर्मी बढाइदिनुपर्ने बताए ।
‘त्यो सुरक्षा थ्रेट भन्ने बहानाबाजी हो । त्यो लाटोले पनि बुझ्छ बहानाबाजी हो भन्ने,’ प्रचण्डले भने, ‘सुरक्षा थ्रेट हो सुरक्षाकर्मी बढाइदिन पर्यो नि ।’
प्रतिक्रिया