बुटवल । एमाले पोलिटब्यूरो सदस्य लिला गिरीले मुलुकका सबै शक्ति एमालेविरुद्ध घेरावन्दी गर्नमा केन्द्रित रहेको आरोप लगाएका छन् ।
सभामुखको भूमिकाका कारण एमालेले निश्चित उद्देश्यका साथ संसदमा अवरोध जारी राखेको तर यसको दोष पनि एमालेमाथि थोपर्न खोजिएको भन्दै उनले सञ्चारकर्मीहरुलाई तथ्यमा रहेर समाचार सम्प्रेषण गर्न आग्रह गरे ।
प्रेस चौतारी नेपाल रुपन्देहीद्वारा बिहीबार बुटवलमा आयोजित नयाँ कार्यसमितिको पदस्थापन तथा सम्मान कार्यक्रममा बोल्दै लुम्बिनी प्रदेशका पूर्वमन्त्री समेत रहेका गिरीले यस्तो बताएका हुन् ।
उनले राष्ट्रियताका मुद्दामा एकतावद्ध भएर कलम चलाउन सञ्चारकर्मीहरुलाई आग्रह समेत गरे । नेता गिरीले राजनीतिक आस्थाका आधारमा कलम चलाउने भन्दा पनि सही र रचनात्मक आलोचनामा केन्द्रित रहेर आफ्नो भूमिका निर्वाह गर्नुपर्नेमा जोड दिए ।
उनले आगामी तीनै तहको निर्वाचनमा जुनसुकै गठबन्धनलाई पराजित गर्ने तागत एमालेसँग रहेको भन्दै पार्टी अव निर्वाचनमा केन्द्रित भएको बताए ।
एमाले केन्द्रीय सदस्य तथा बुटवल उपमहानगरपालिकाका प्रमुख शिवराज सुवेदीले मुलुकको विषम परिस्थितिमा सञ्चारकर्मीहरुको काँधमा गहन जिम्मेवारी र दायित्व आएको बताउँदै राजनीतिलाई सही दिशामा अघि बढाउनेतर्फ भूमिका खेल्न आग्रह गरे । उनले बुटवल उपमहानगरपालिकाले थुप्रै विकासका योजना कार्यान्वयनमा ल्याइसकेको बताए ।
एमाले रुपन्देहीका अध्यक्ष तेजेन्द्र केसीले संगठनलाई एकतावद्ध बनाएर विद्यमान चुनौतीलाई आत्मसाथ गर्ने गरी अघि बढ्न प्रेस चौतारीको नयाँ कार्यसमितिलाई शुभकामना दिए । एमाले रुपन्देहीका प्रचार विभाग प्रमुख हितराज पन्थीले सञ्चारकर्मीहरुसँग पार्टीले सहकार्य गरी अघि बढ्ने बताउँदै जिम्मेवार भएर कलम चलाउन आग्रह गरे ।
कार्यक्रममा अध्यक्ष अमृत गिरीले नवनिर्वाचित अध्यक्ष लक्ष्मण पौडेललाई पदहस्तान्तरण गर्दै संगठनको माइन्यूट प्रदान गरेका थिए ।
त्यस अवसरमा प्रेस स्वतन्त्रता सेनानी अर्जुन ज्ञवाली र पत्रकार डिआर घिमिरेलाई अग्रज पत्रकारको रुपमा सम्मान गरिएको थियो । त्यस्तै पत्रकारहरु विरेन्द्र मिश्रा, कृष्ण मल्ल र अरुण ज्ञवालीलाई दुर्गा खनाल स्मृती पत्रकारिता पुरस्कार तथा दिनेश श्रेष्ठ, शशि पन्थी र विष्णु खत्रीलाई प्रेस चौतारी युवा प्रोत्साहन पत्रकारिता पुरस्कारबाट नगदसहित पुरस्कृत गरिएको थियो ।
प्रतिक्रिया