बुटवल । नेवाः समुदायमा एकता र भातृत्व कायम हुन नसक्दा नेवाः बाहुल्य रहेको स्थानहरुमा पनि नेवारहरु पछि परेको नेवाः समुदायका अगुवाहरुले बताएका छन् । उनीहरुले नेवाः समुदायका अगुवाहरु स्वयं भाषा, संस्कृति र सम्पदा संरक्षण तर्फ भन्दा अन्य समुदायको गोटी बन्न पुग्दा समुदाय पछि पर्दैगएको बताए । नेवाः भाषा, संस्कृति र सम्पदाको संरक्षण गर्न फुटेर होईन जुटेर अगाडी बढ्नु पर्ने उनीहरुको सुझाव छ ।
हलिं नेवाः गुथि रुपन्देहीको १३ औ साधारण सभाको उदघाटन सत्रमा बोल्ने वक्ताहरुले नेवाः समुदाय बाहुल्य रहेको बुटवल लगायतका शहरहरुमा नेवारहरुको पहुँच कम हुँदै गएको गुनासो गरेका थिए ।
उदघाटनका अवसरमा बोल्दै नगर प्रमुख सुबेदीले नेपालमा भएका सबै जातजातिका धर्म, संस्कृति जगेर्ना गर्न सरकारको ध्यान दिएको दाबी गर्दै बुटवल उपमहानगरपालिकालाई मानवता र सभ्यताको शहर घोषणा गरि आवश्यक कार्यहरु अघि बढाएको दाबी गरे ।
नेवाः पुच नेवा परिषदका निर्वतमान अध्यक्ष ज्ञानु लिगलले रुपन्देहीमा रहेका नेवारहरुलाई एकतावद्घ गरि भाषा र संस्कृतिलाई जगेर्नाको अभियानको थालनी गरेको बताईन । देशभर छरिएका नेवारहरुको भेषभुषा, भाषा र संस्कृतिबारे नया पुस्तामा पुस्तान्तरण गर्ने गरि कार्यहरुमा जोड दिनुपर्ने उनले सुझाव दिईन् ।
कार्यक्रममा बुटवल उपमहानगरपालिकाका वडा न ३ का वडा सदस्य तथा भिमसेन नेवा समाजका अध्यक्ष लिला प्रसाद श्रेष्ठले नेपालको आदिबासी भएर पनि हरेक क्षेत्रमा पछिपरेको दुखेसो गरे ।
हलिं नेवाः गुथिका केन्द्रीय अध्यक्ष जुजुमान श्रेष्ठले देशभरका नेवारहरुलाई हकअधिकार प्राप्त गर्ने लक्ष्यसहित स्थापना भएको संस्थामा एकतावद्घ गराउदै लैजाने लक्ष्य रहेको बताए । नेपालको राष्ट्रिय भाषाको रुपमा संयुक्त राष्ट्र संघमा रञ्जना लिपि दर्ता भएको स्मरण गराउदै उनले नेवारी संस्कृति देशको पहिचान भएको बताए ।
हलि नेवाः गुथि, बुटवल पुच अध्यक्ष राजु श्रेष्ठले भाषा,संस्कृति जोगाउने र जातिय सहयोगका रुपमा स्थापना भएको भन्दै पवित्र काममा आफुहरु लागेको बताए ।
विहिबार एक कार्यक्रमका बीच बुटवल उपमहानगरपालिका नगरप्रमुख शिवराज सुवेदीेले साधारणसभाको उद्घाटन गरेका थिए । तिलोत्तमा मैजु खलको संयोजनमा भएको कार्यक्रममा नगरप्रमुख सुवेदीले संस्थाको वार्षिक स्मारिका (लुमन्ति पौ) पुस्तक विमोचन समेत गरेका थिए ।
साधारण सभासंगै सहभागीहरुलाई विशेष नेवारी भोजको परिकार पनि खुवाइएको थियो । यसका लागि टिष्टुङ शाखाबाट ४५ जनाको टोलीले सहयोग गरेका थिए । जसमा ८ आईटमको समयवजी र १७ वटा आईटम भएको भोज खुवाईएको थियो ।
बुटवलको आयोजक संस्था तिलोत्तमा मैचु पुच अध्यक्ष मिलन श्रेष्ठले कार्यक्रममा देशभर १ सय १८ शाखाका ८ सय जना सहभागी भएको बताउदै पर्यटन प्रवद्र्धनमा यो महत्वपूर्ण भएको बताईन । तिलोत्तमा मैचु पुच हलिं गुथिको ६६ शाखा हो । बुटवलमा ३ वटा शाखाहरु छन । संस्थाको अमेरिका र कोरियामा समेत शाखा रहेका बताइएको छ । कार्यक्रम सुरुहुनु अघि नेवारी भेषभुषासहित दुर्गा मन्दिरबाट प्रभातफेरि कार्यक्रम शुरु भएर हाटबजार, अमरपथ, विपि चोक हुँदै हाटबजार विश्वहिन्दु महासंघमा पुगेर सम्पन्न भएको थियो ।
प्रतिक्रिया