स्याङ्जा । नेकपा एमालेका उपाध्यक्ष विष्णु पौडेलले बुटवल पुगेर कालीगण्डकी-तिनाउ डाइभर्सन आयोजना पूरा भएरै छाड्ने दाबी गरेको २ दिन पछि गण्डकी प्रदेशका मुख्यमन्त्री कृष्णचन्द्र नेपाली पोखरेलले कुनै पनि हालतमा कालीगण्डकी डाइभर्सन हुन नदिने बताएका छन् ।
स्याङ्जाको चापाकोट–८ खोरियाघाटमा आयोजना गरिएको धार्मिक कार्यक्रमलाई सम्बोधन गर्दै मुख्यमन्त्री पोखरेलले कालीगण्डकी सभ्यताको संरक्षणका लागि पनि डाइभर्सन कुनै हालतमा हुन नदिने बताए । उनले कालीगण्डकी नदी अन्य नदीजस्तो नभएको उल्लेख गर्दै कालीगण्डकीको छुट्टै महत्व र विशेषता रहेको बताए ‘कालीगण्डकी हाम्रो सभ्यता, आस्था, भावना र शालिग्रामसँग जोडिएको छ ।’ उनले भने ।
गण्डकी प्रदेशको उन्नति र विकासको महत्वपूर्ण आधार पर्यटन भएको बताउँदै मुख्यमन्त्री पोखरेलले धार्मिक र सांस्कृतिक आस्थाको रुपमा रहेको यस नदीको सभ्यतासँगै बृहत्तर योजनाका बारेमा अध्ययन गर्नका लागि कार्यदल बनेको जानकारी दिए । कार्यदलले दिएको प्रतिवेदनका आधारमा आगामी वर्षदेखि थप योजना बनाउने मुख्यमन्त्री पोखरेलले आश्वासन दिए ।
उनले गण्डकी प्रदेश सरकारले कालीगण्डकी नदीलाई विश्व सम्पदा सूचीमा सूचीकृत गर्नका लागि बृहत्तर रुपमा नीति तथा योजना ल्याउने जानकारी समेत दिए ।
प्रतिक्रिया