बुटवल । व्यवस्था, शासन र सत्ताको विरोधमा आगो ओकल्दै आएका जन गायक जीवन शर्माले उत्पादन, समृद्दी र स्वाभिमान झल्काउने नयाँ गीत बजारमा ल्याएका छन् । नेपालभित्रै श्रम गरेर स्वाभिमान जगाउन आह्वान गर्दै गायक शर्माले रेमिट्यान्सको भरमा देश चलाउन नहुने सुझाव गीत मार्फत दिएका छन् ।
प्राय सत्ताका विरोध र क्रान्तिका ज्वाला दन्काउने खालका गीत गाउने गरेका शर्माले पछिल्लो समय नेपालमा चल्दै आएको भ्रष्टाचार, विकृति र विसंगतिका विरुद्ध शब्द कोर्ने गरेका छन् । राष्ट्रिय भावनाबाट ओटप्रोटका शब्दहरु पनि शर्माका पछिल्लो रचनाहरुमा पाईने गरेको छ ।
‘मधेसी, पहाडी, हिमालका हिमाली, सबै जाती जनजाती हामी सबै नेपाली….’को रचना गर्दा देशमा जात, थर र वर्णका आधारमा राज्य पुनरसंरचना गर्न नहुने भावना पोखेका शर्माले ‘चाहिंदैन मलाई सुनका दरबार, चाहिँदैन मलाई चमेलीको बास …..’गाईरहँदा भ्रष्टाचार र कुरितीका विरुद्ध सशक्त प्रतिरोध गरेका छन् । शर्माको पछिल्लो ‘यही माटोमा’ म्युजिक भिडियो सार्वजनिक भएको छ । ‘यही माटोमा पसिना पोखौंं युवाको आँटले, बिदेशी भारी नबोकौ अव नेपाली काँढले …’जीवनले आह्वान गरेका छन् ।
गीतकै शब्दमा उनले रेमिट्यान्सबाट देश चलाउने सोंचाई नराख्न पनि आग्रह गरेका छन् । बिदेशबाट आएको रेमिट्यान्सले पैसा मात्र नआएको त्यसले संस्कृति, भाषा र भेष समेत मासिंदै गएको चिन्ता पनि व्यक्त गरेका छन् ।
शनिबारबाट सार्वजनिक भएको यही माटोमा म्युजिक भिडियोलाई शर्माले राष्ट्रिय भावनाको गीत भएको खबरकुरालाई बताए । उनले देशमा अव समृद्दी र स्वाभिमानसँगै देश प्रेम आवश्यक देखिएको बन्दै युवालाई देशमा रोक्न नसक्दा गाँउघर रित्तिन थालेको बताए ।
प्रतिक्रिया