बुटवल । स्थानीय तह निर्वाचनमा बुटवल उपमहानगरपालिकामा मनोनयन दर्ता गराएका नेवार उम्मेदवारहरुकाबीच अन्तरक्रिया गरिने भएको छ । उपमहानगरको विभिन्न पदमा उम्मेदवारी दिएका सबै पार्टी र स्वतन्त्र उम्मेदवारहरुसँग समुदायका लागि उनीहरुले तयार गरेको एजेण्डाका विषयमा अन्तरक्रिया गर्न लागिएको हो ।
नेवाः पत्रकार समाजको आयोजना र नेवा सेवा समितिको संयोजन सहित बुटवलमा क्रियाशिल नेवाः समुदाय सम्बद्ध पुचः र खलको तत्वावधानमा नेवार उम्मेदवारसँग अन्तरक्रिया हुन थालेको आयोजक नेवाः पत्रकार समाजले जनाएको छ । नेवाः समुदायबाट उम्मेदवारी पाउन सफल उम्मेदवारहरुसँग बुटवलमा नेवाः भाषा, संस्कृति र सम्पदा संरक्षणका विषयमा छलफल गरेर साझा धारणा बनाउन अन्तरक्रिया कार्यक्रम थर्न थालिएको नेवा सेवा समाजका अध्यक्ष चिरन्जिवी श्रेष्ठले बताए ।
बुटवल उपमहानगरपालिकामा ठुलो संख्यामा नेवाःसमुदायको बसोबास हुँदै आएको भएपनि ४ वटा वार्डमा वार्ड अध्यक्ष सहित २७ जना नेवारहरुलाई मात्र बिभिन्न दलहरुले उम्मेदवार बनाएका छन् ।
बिहिबार मध्यान्ह १ बजे आयोजना हुने अन्तरक्रियामा बुटवलका बिभिन्न नेवाः संघ संस्थामा आवद्ध पदाधिकारी सहित नेवार उम्मेदवारहरुलाई अन्तरक्रियामा भाग लिन आमन्त्रण गरिएको नेवाः पत्रकार समाजका अगुवा पत्रकार स्वस्तिक श्रेष्ठले बताए ।
प्रतिक्रिया