सहमति, सहकार्य र एकता आजको आवश्यकता : अध्यक्ष प्रचण्ड

काठमाडौं । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले सहमति, सहकार्य र एकता आजको आवश्यकता भएको बताएका छन् ।

पाँच दलीय गठबन्धनले आज राजधानीको शान्तिबाटीकामा आयोजना गरेको संयुक्त सभालाई सम्बोधन गर्दै उनले उक्त कुरा बताएका हुन् ।

‘सहमति, सहकार्य र एकता आजको आवश्यकता हो,’ अध्यक्ष प्रचण्डले भने, ‘एकताको बलमा पञ्चायत र राजा फाल्यौं र संविधान बनायौं ।’

एकताको अनुभव हालै सम्पन्न राष्ट्रियसभा र बारको निर्वाचनमा गरेको समेत उनले बताए ।

उनले अहिले देशमा दुई वटा गठबन्धन रहेको बताए । नेकपा एमालेको नेतृत्वमा संविधान विरोध गठबन्धन र पाँच दलीय प्रगतिशितल गठबन्धन रहेको उनले जनाए । कुन गठबन्धन सही र गलत भन्ने स्थानीय निर्वाचनले निक्र्योल गर्ने उनले बताए ।

प्रचण्डले केपी ओलीलाई ठुलो संघर्षका रुपमा नायकका रुपमा लगेको भएपनि एकता गरेको दुई हप्ता नपुग्दै धोका जालझेल, षडयन्त्र र धोकाबाहेक केही नदेखिएको बताए ।

प्रचण्डले आफु अलि बढी नै सोझो, धेरै लचिलो र त्यागी रहेको भन्दै आफुलाई गहिरो गरी हेर्न सुझाव दिए । उनले मतदाताहरूलाई गठबन्धनका उम्मेदवारका चुनाव चिन्हमा मतदान गर्न आग्रह गर्दै हँसिया हथौडा, रुख र कलमलाई सहज रुपमा लिन आग्रह गरे ।

हँसिया हथौडा र चारतारे झण्डा सँगै नफहराएको भए संघीय लोकतान्त्रिक गणतन्त्र सम्भव नहुने भन्दै अब पनि रुख वालाले हँसिया हथौडा र हँसिया हथौडा वालाले रुखमा छाप हान्नै पर्ने बताए । उनले यो नै लोकतन्त्र, प्रगतिको हितमा हुने बताए ।