प्रदिप ज्ञवालीको गृह गाँउपालिकामा माओवादी केन्द्रका यदु ज्ञवाली विजयी

गुल्मी । २०४३ सालको निर्वाचन यता कहिल्यै नहारेको तत्कालिन नेकपा माले र अहिलेको एमालेको किल्ला रुरुक्षेत्र गाँउपालिका पहिलो पटक एमाले पराजित भएको छ । गठबन्धनबाट माओवादी केन्द्रका उम्मेदवार यदु ज्ञवालीले ४ दशकदेखि एमालेले आफ्नो किल्ला मान्दै आएको रुरुलाई पहिलो पटक भत्काईदिएका छन् । एमाले नेता प्रदिप ज्ञवाली, कमल श्रेष्ठ, निलकण्ठ गौतम जस्ता एमाले नेताहरु जन्माएको रुरुक्षेत्रमा स्थानीय तह निर्वाचनमा एमाले पराजित भएको छ ।

मतगणनाको पछिल्लो परिणाम अनुसार रुरुक्षेत्र गाउँपालिकामा सत्ता गठबन्धनका साझा उम्मेदवार यदु ज्ञवालीले विजयी भएका छन् । उनले एमालेका प्रभावशाली मानिएका हिमाल श्रेष्ठलाई पछि पार्दै पालिका अध्यक्षमा विजयी भएका हुन् ।

सोमवार साँझ आएको मत परिणाम अनुसार माओवादी उम्मेदवार ज्ञवालीले ५८१७ पाएर विजयी भएका छन् भने उनका प्रतिद्वन्दी श्रेष्ठले ४५४० भोटसहित दोस्रो पराजित भएका छन् ।

उपाध्यक्षमा भने एमालेकी मीना गौतम विजयी भएकी छन् । उनले ५४५१ मत पाएकी छन् । गठबन्धनबाट कांग्रेस उम्मेदवार दुर्गा ज्ञवालीले ४६४६मत पाएकी छन् ।