हात्तीको आक्रमण टीकापुरमा एक वृद्धाको मृत्यु

टीकापुर । कैलालीको टीकापुरमा हात्तीको आक्रमणबाट एक वृद्धाको मृत्यु भएको छ ।

मजदुरी गरेर घर फर्किरहेकी टीकापुर नगरपालिका-१ ब्लक नं १५ की टङ्क सोडारीको मृत्यु भएको इलाका प्रहरी कार्यालय टीकापुरले जनाएको छ ।

कर्णाली नदी किनार सनकट्टीघाटमा शनिबार साँझ जङ्गलबाट निस्केका दुईवटा हात्तीले सोही नदीमा भइरहेको तटबन्धमा मजदुरी गरेर घर फर्किरहेकी सोडारीलाई आक्रमण गरेको प्रहरी नायब उपरीक्षक हेमबहादुर शाहीले बताए ।

नदी किनारमा तटबन्धका लागि अन्य तीन महिला ढुङ्गा सङ्कलन गरिरहेका थिए । एक्कासी दुईवटा हात्ती नजिकै देखेपछि दुई महिला भागे पनि सोडारीलाई हात्तीले लछारपछार गरेको हो ।

पछिल्लो समय कैलाली र बर्दियामा जङ्गली जनावरको आक्रमण बढ्दै गएको छ । यसबाट जङ्गल आसपासमा भएका क्षेत्रमा बर्सेनि दर्जनौँ मानिसको ज्यान जाने गरेको छ ।