काठमाडौं । मलेसियामा आयोजना हुने एसीसी महिला टि २० च्याम्पियनसिपका लागि नेपाली राष्ट्रिय महिला क्रिकेट टोलीको आज बिदाई हुँदैछ ।
मलेसियामा आयोजना हुने एसीसी महिला टि २० च्याम्पियनसिपका लागि मलेसिया जाने महिला टोलीलाई बिदाई गर्न लागिएको हो । एशियन क्रिकेट काउन्सिल (एसिसी) को आयोजना हुन लागेको प्रतियोगिता जुन १७ देखि २५ सम्म मलेसियमा हुँदैछ ।
१० टोलीले सहभागिता जनाउने प्रतियोगितामा आयोजक मलेसियासहित नेपाल, बहराइन, भुटान, हङकङ, कुवेत, सिंगापुर, ओमान, कतार र संयुक्त अरब इमिरेटस (युएई) रहेका छन । आयोजकले सहभागी १० टोलीलाई दुई समूहमा विभाजन गरेको छ । जसअन्तर्गत नेपाल समूह बीमा रहेको छ ।
नेपाल सम्मिलित समूहमा बहराईन, भुटान, हङकङ र कुवेत रहेका छन । यस्तै समूह ए मा मलेसिया, ओमान, कतार, सिंगापुर र युएई समावेश छन । समूहको प्रतिष्पर्धामा हरेक टोलीले एक आपसमा प्रतिस्पर्धा गर्नेछन ।
समूह चरणको प्रतिस्पर्धा पछि दुवै समूहका शीर्ष दुई टोली सेमिफाइनलमा प्रवेश गर्नेछन । फाइनलमा प्रवेश गरेका दुई टोली अक्टोबरमा आयोजना हुने महिला टी–२० एशिया कपमा छनोट हुनेछन । छनोट हुने टोली भारत, पाकिस्तान, श्रीलंका र आयोजक बंगलादेश जस्ता टोलीसँग एशियाकप खेल्नेछन । प्रतिष्पर्धामा नेपालले जुन १७ मा भुटानविरुद्ध खेल्दै प्रतियोगिताको आरम्भ हुनेछ । यस्तै, नेपालले जुन १८ मा किनरारा स्टेडियममा कुवेतको सामाना गर्दा तेस्रो खेल जुन २० मा बहराइनबिरुद्ध खेल्नेछ । यस्तै अन्तिम खेल नेपालले जुन २१ मा हङकङबिरुद्ध खेल्ने तालिका रहेको छ ।
प्रतिक्रिया