काठमाडौं । भारतबाट पेट्रोलियम पदार्थ खरिद गर्न नसक्ने अवस्थामा पुगेपछि नेपाल आयल निगमले पेट्रोल डिजेलमा कोटा तोक्ने प्रस्ताव गरेको छ ।
निगमले सरकारलाई पत्र पठाउँदै पेट्रोलियम पदार्थमा कोटा तोक्नुपर्ने प्रस्ताव गरेको हो । जसअनुसार एक पटकमा मोटरसाइकललाई बढीमा ५ लिटर र साना सवारी साधनलाई २० लिटरसम्म तेल दिने गरी प्रस्ताव पठाएको हो ।
निगमले सरकारी तथा निजी सवारी साधनमा जोर विजोर प्रणाली संचालन गर्न पनि प्रस्ताव गरेको छ ।
यसैगरी प्रमुख शहरमा शनिबार गाडी चलाउन निषेध गर्दै सार्वजनिक विदा गर्नुपर्ने प्रस्ताव समेत निगमले गरेको छ ।
निगमले अहिलेसम्म भारतीय आयल कर्पोरेसनलाई ३० अर्ब रुपैयाँ तिर्न बाँकी छ। पेट्रोल डिजेलमा असाध्य मूल्यवृद्धि भएपछि सरकारले करको मूल्य घटाउने आश्वासनसहित दिँदै मूल्य घटाउने निर्देशन दिएको थियो । सो निर्देशनअनुसार डिजेल र पेट्रोलको मूल्य घटे पनि कर भने अझै घटेको छैन । जसका कारण निगमको भुक्तानी बक्यौता थपिँदै गएको छ ।
निगम अहिले मासिक १० अर्ब रुपैयाँ भन्दा बढीको घाटामा रहेको छ ।
प्रतिक्रिया