नेपालगन्ज । नेपालगन्ज नाकाबाट भित्रिएको कुखुराका कारण नेपालभरीकै कुखुरा व्यवसायमा असर परेको भन्दै काठमाडौं र चितवनका कुखुरा व्यवसायीहरु नाका कडाईको माग गर्दै नेपालगन्ज पुगेका छन् । खुल्ला नाकाको फाईदा उठाएर अबैध कुखुरा भित्रिएका कारण देशैभरीको कुखुरा व्यवसाय धरापमा परेको भन्दै उनीहरुले बाँकेका प्रमुख जिल्ला अधिकारीलाई भेटेर नाकामा कडाई गरिदिन आग्रह गरेका छन् ।
कुखुरा व्यवसायीहरुले अन्य नाकामा कडाई गरिएपनि नेपालगन्ज नाकाबाट ठुलो परिमाणमा अबै कुखुरा पैठारी भएको भन्दै जिल्ला प्रशासन कार्यालय, बाँकेमा पुगेर प्रमुख जिल्ला अधिकारी सूर्यबहादुर खत्रीलाई ज्ञापनपत्र समेत बुझाएका छन् । काठमाडौं, चितवन, धादिङ लगायतका जिल्लाबाट आएका व्यवसायीहरुले आज बिहानै सीमानाकाका खुद्रा कुखुराको मासु बेच्ने पसलको अवलोकन गरेका थिए । अवलोकनका क्रममा नेपालगन्ज र यस आसपासका क्षेत्रमा खुल्लेआम भारतबाट आएको कुखुरा र कुखुराको मासुको बेचबिखन भईरहेको पाईएको उनीहरुले बताए । व्यवसायीहरुले केही मासु पसलबाट भारतीय कुखुरा बरामद गरेर प्रहरीलाई बुझाएका थिए ।
भारतीय कुखुराका कारण नेपाली कुखुरा पालक किसान र मासु व्यवसायीको व्यवसाय धरापमा परेको कुखुरा व्यवसायी संघ, बाँकेका अध्यक्ष ईश्वर सुवेदीले बताए । प्रहरी प्रशासनले कडाई नगरेका कारण व्यवसाय नै बन्द हुने अवस्थामा पुगेको सुबेदीले बताए ।
बाँकेको खुल्ला नाकाबाट अवैध रुपमा भित्रिने कुखुरा र कुखुराको मासु बुटवल, चितवन हुँदै काठमाडौं सम्म पुग्ने गरेको व्यवसायीको भनाई छ । अबैध पैठारीका कारण करोडौंको लगानी डुब्ने अवस्थामा पुगेको नेपाल दाना उद्योग संघका अध्यक्ष रविन पुरीले बताए ।
व्यवसायीहरुसँग ज्ञापनपत्र बुझ्दै बाँकेका प्रमुख जिल्ला अधिकारी सुर्यबहादुर खत्रीले नाकामा थप कडाई गर्ने आश्वासन दिएका छन् ।
प्रतिक्रिया