काठमाडौं । पूर्वप्रधानमन्त्री डा.बाबुराम भट्टराईले नेपाल समाजवादी पार्टी निर्वाचन आयोगमा दर्ता गराएका छन् । जनता समाजवादी पार्टीबाट अलग भएका भट्टराईले नयाँ पार्टी दर्ता गरेका हुन् ।
जसपामा विवाद भएपछि पछिल्लो समय उपेन्द्र यादव र भट्टराई सौहार्दपूर्ण वातावरणमा अलग हुने सहमति गरेका थिए । निर्वाचन आयोगले भट्टराई समूहको आग्रहमा यसअघि नै आयोगमा दर्ता भएको समावेशी लोकतान्त्रिक पार्टीको नाम परिवर्तन गरेर नेपाल समाजवादी पार्टी बनाइदिएको हो ।
निर्वाचन आयोगले समावेशी लोकतान्त्रिक पार्टीको नाम परिवर्तन गरी नेपाल समाजवादी पार्टी र चुनाव चिह्न आँखालाई अद्यावधिक गरेको भट्टराई समूहका नेता विश्वदीप पाण्डेले बताए । यो चुनाव चिह्न कुनै समय भट्टराई नेतृत्वको नयाँ शक्ति पार्टीको थियो ।
जनता समाजवादी पार्टी (जसपा) मा विवाद चर्किएको अवस्थामा भट्टराई निकट दीपक लामिछानेको अध्यक्षतामा समावेशी लोकतान्त्रिक पार्टी नामको दल गत ५ फागुनमा निर्वाचन आयोगमा दर्ता भएको थियो ।
समावेशी लोकतान्त्रिक पार्टी बाटठ रुपान्तरित भएर बनेको नेपाल समाजवादी पार्टीको केन्द्रीय समिति बैठक बसेर पदाधिकारी चयन गर्ने बताइएको छ ।
प्रतिक्रिया