रुपन्देहीमा एक हजार चोरेको निहुमा श्रीमतीको हत्या

बुटवल । रुपन्देहीको कञ्चन गाँउपालिका डेलरका एकजना पुरुषले एक हजार पकेटबाट निकालेको निहुमा आफ्नै श्रीमतीको हत्या गरेका छन् ।

कञ्चन गाउँपालिका(१ डेलरमा बस्ने यमबहादुर थापाले गोजीबाट एक हजार निकालेको निहुमा श्रीमतीलाई कुटपिट गरेर हत्या गरेको प्हरीले जनाएको छ । डेलरमा श्रीमान र छोरासँग बसोबास गर्दै आईरहेकी वर्ष ३१ की साबित्री थापा क्षेत्री आफ्नै सुत्ने कोठामा मृत अवस्थामा फेला परेकी थिईन् ।

सोही घटनाको अनुसन्धानबाट साबित्रीको उनकै श्रीमानले हत्या गरेको खुलेको इलाका प्रहरी कार्यालय सालझण्डीका प्रहरी निरीक्षक जगन्नाथ मरासिनीले बताए । शवको प्रकृति हेर्दा मृतकलाई टाउकोमा गहिरो चोट लागेको, कपालमा काठको टुक्राहरु र कोठामा रगत बगेको र छिटाहरु देखिएको र शरिरका विभिन्न भागमा निलडामहरु समेत देखिएको मरासिनीले बताए ।

प्रहरीले दिएको जानकारी अनुसार मंगरबार साँझ यम बहादुर थापाले घर नजिकै रहेको पसलमा मादक पदार्थ सेवन गरी आई सुतेकोमा उनकी श्रीमति सावित्री थापाले सोही दिन साँझ दराजमा श्रीमानले राखेको एक हजार रुपैयाँ लिई रक्सी किनेर खाई रातको समयमा आई श्रीमती सावित्री थापा सोहि कोठाको भुँईमा, श्रीमान यम बहादुर थापा र छोरा खाटमा सुतेका थिए ।

रातको करिब २ बजेको समयमा यम बहादुर थापा उठेर दराजमा राखेको पैसा गन्दा एक हजार कम भएपछि निज यम बहादुरले श्रीमतीलाई उठाई पैसा नसोधी किन लिई गएको भनि कुटपिट गर्ने क्रममा श्रीमतीको कपाल समाई आफैँ सुतेको खाटको खुट्टा र भित्तामा टाउको ठोकिदिई श्रीमतीको हत्या गरेको प्रहरीले जनाएको छ ।

श्रीमती हत्याको आरोपमा यम बहादुर थापा क्षेत्रीलाई पक्राउ गरी ज्यान सम्बन्धि कसुर अन्तर्गत म्याद थप गरि थप अनुसन्धान कार्य भैरहेको प्रहरी निरिक्षक मरासिनीले बताए ।