कर्णाली नदीको कटानले राजापुर र श्रीलंका गाउँ जोखिममा

टीकापुर । कर्णाली नदीले बर्दियातर्फ कटान तीव्र पारेपछि सत्ती पुल, बर्दियाको राजापुर र टीकापुर नगरपालिका-८ स्थित श्रीलंका गाउँ जोखिममा रहेका छन् ।

कैलाली र बर्दिया जोड्ने सत्ती पुलको बर्दियातर्फ कटान भएपछि पुल र बस्ती जोखिममा परेको हो। पुलको उत्तरपट्टि करीब २० मिटर माथि गरिएको तटबन्ध भत्किएको र ड्याम भासिएर भत्कन थालेको छ । सत्ती पुल निर्माण भएदेखि नै जोखिममा रहेको बताइएको छ ।

हरेक वर्ष बर्दियातर्फ तटबन्ध भत्कँदै गएकाले नदीको भँगालो बर्दियातर्फ छिर्ने जोखिम बढेको छ । बर्दियातर्फ नदीको भँगालो पसेमा टीकापुर-८ श्रीलंका डुबानमा पर्ने जोखिम छ । त्यहाँ करिब ५० परिवार बस्दै आएका छन् ।

हजारौं बिघा खेती कटानको जोखिममा छ । श्रीलंकामा बस्ती सुरक्षाका लागि सशस्त्र प्रहरीको बीओपी रहेको छ। विद्यालय, आधारभूत स्वास्थ्य एकाइ पनि जोखिममा पर्ने जनाइएको छ ।

टीकापुर-८ का वडाध्यक्ष दीर्घबहादुर ठकुल्लाले शनिबार कटान क्षेत्र र श्रीलंका बस्ती अनुगमन र स्थानीयसँग छलफल भएको बताए । नदी बस्तीमा पस्नसक्ने जोखिम रहेकाले त्यहाँका नागरिकलाई उद्धारका लागि नगरपालिका तयारी अवस्थामा रहेको उनको भनाइ छ ।

नदी बर्दियातर्फ पसेमा राजापुर क्षेत्रको जङ्गल र राजापुरका विभिन्न बस्ती र बजारसमेत जोखिममा पर्ने भएका छन् । गत वर्ष पनि कैलाली र बर्दिया जिल्ला जोड्ने हुलाकी राजमार्गमा रहेको यो पुल अवरुद्ध भएपछि ६ दिन बन्द गरिएको थियो । पुलको पूर्व अर्थात् बर्दियातर्फको भाग भाँसिएको थियो ।

सत्ती पुल भएर दैनिक सयौँ सवारीसाधन र हजारौँ नागरिक आवतजावत गर्छन् । नदी कटान भएर बस्ती पसेमा राजापुर-४ को सङ्घर्षनगर, मुक्त कमैया बस्ती, छेदियालगायत दर्जन गाउँमा बाढी पस्ने खतरा बढ्नेछ । जलस्तर बढ्दै गएपछि कर्णालीमा हरेक वर्ष नदी कटान र नदीले धार परिवर्तन गर्दै आएको छ ।

पानीको बहाव बढी भएकाले ठूलो बाढी आउनासाथ पुल बगाउने जोखिम बढेको छ । जेनतेन टालटुल पारेर संरक्षण हुँदै आएको पाँच सय ३१ मिटर लामो पुल ६ वर्षअघि ४६ करोड लागतमा रसुवा कन्स्ट्रक्सनले निर्माण गरेको हो ।