परराष्ट्रमन्त्री खड्का र चिनियाँ समकक्षी वाङ यी बीच चीनको छिङताओमा भेटवार्ता हुँदै

काठमाडौं । चीन भ्रमणमा रहेका परराष्ट्र मन्त्री नारायण खड्का र चिनियाँ समकक्षी वाङ यी बीच आज द्वीपक्षीय वार्ता हुने भएको छ ।

परराष्ट्र मन्त्रालयका अनुसार मन्त्री खड्का र चिनियाँ समकक्षी यीबीच चीनको छिङताओ सहरमा वार्ता हुन लागेको हो । द्विपक्षीय वार्तामा नेपाल-चीन सम्बन्धका विभिन्न विषयबारे छलफल हुने बताइएको छ।

चिनियाँ विदेश मन्त्री यीले नेपाली टोलीको सम्मानमा आजै भोज दिने कार्यक्रम रहेको छ ।

चिनियाँ विदेशमन्त्री यीको मैत्रीपूर्ण निमन्त्रणामा मन्त्री खड्का गएराति चीन गएका हुन् । खड्काको भ्रमण टोलीमा परराष्ट्र, गृह, भौतिक पूर्वाधार, वाणिज्य र अर्थ मन्त्रालयका उच्च अधिकारी पनि सहभागी छन्।

शेरबहादुर देउवा नेतृत्वको सरकार बनेपछि यो नै नेपालबाट भएको पहिलो उच्चस्तरीय भ्रमण हो । यसबीचमा चिनियाँ विदेशमन्त्री वाङ यी लगायत चिनियाँ कम्युनिष्ट पार्टीको उच्च नेतृत्वले भने नेपाल भ्रमण गरिसकेको छ ।

परराष्ट्र मन्त्री खड्कासहितको टोली बिहीबार स्वदेश फर्कने छ।