चितवन । नारायणगढ-मुग्लिन सडकखण्डमा पहिरो खस्दा सडक अवरुद्ध भएको छ ।
भरतपुर महानगरपालिका-२९ केराबारीमा आज बिहान पहिरो खसेको हो । पहिरोले सडक पूर्णरुपमा अवरुद्ध भएको जिल्ला ट्राफिक प्रहरी कार्यालयले जनाएको छ ।
पहिरोका कारण सडक दुईतर्फी अवरुद्ध भएको जिल्ला प्रहरी कार्यालयका प्रवक्ता प्रहरी नायब उपरीक्षक नरहरि अधिकारीले बताए । अवरुद्ध सडक खुलाउन पहल भइरहेको उनले बताए ।
तर, निरन्तर पानी परिरहेकाले बगिरहेको लेदो पन्छाउन कठिन भएको छ । पहिरोका कारण यात्रु र सवारीसाधन बाटोमै रोकिएका छन् ।
वर्षायाम शुरु भएसँगै यो सडकमा पटकपटक पहिरो जाने गरेको छ। जसले गर्दा यात्रुले सास्ती खेप्नु परिरहेको छ ।
प्रतिक्रिया