बुटवल । आगामी मंसिर ४ गते हुने प्रतिनिधिसभा निर्वाचनमा नेपाल समाजवादी केन्द्रका तर्फबाट सो पार्टीका केन्द्रीय सदस्य तथा युवा नेता पंकज राईले उम्मेदवार बन्ने दावी प्रस्तुत गर्दै उम्मेदवारी घोषणा गरेका छन् ।
राजनीतिमा युवा र समावेशी नेतृत्व जरुरी रहेको भन्दै वकालत गर्दै आएका राईले बुधवार रुपन्देही क्षेत्र नंं २ र ३ मध्ये कुनै एउटा क्षेत्रमा पार्टीकोतर्फबाट उम्मेदवारी दिने सार्वजनिक घोषणा गरेका हुन । राईले आफु कुनै व्यक्तिको विरुद्ध नभएर आफ्नो पार्टीले लिएको समावेशी तथा समाजवादी नीति तथा कार्यक्रमलाई जनताको माझमा लगेर हिमाल पहाड र तराईलाई जोडेर लैजाने उद्देश्यकासाथ उमेद्ववारी दिन लागेको बताएका छन् ।
नेपालको राजनीतिमा एक चर्चित क्षेत्रका रुपमा रहेको रुपन्देही क्षेत्र नं. २ र ३ मा राईले उम्मेदवारी घोषणा गरेसगैं राजनीतिमा युवाहरुको आकर्षण बढेको संकेत गरेको छ । उनको पार्टी बर्तमान गठबन्धनमा रहेर निर्वाचनमा जाने नीति पारित गरेको अवस्थामा राईको उम्मेदवारी घोषणाले गठबन्धनमा नयाँ छलफल हुने संकेत पनि दिएको छ ।
राईले बर्तमान निर्वाचन प्रणाली निकै खर्चिलो र जनताको सहि प्रतिनिधित्व हुने खालको नभएको हुदा त्यसलाई परिर्वतन गरि पूर्ण समावेशी बनाउनु पर्ने बताएका छन् । उनले संघियतालाई बदनाम गर्ने र केन्द्रीय मानसिकता बोकेका जनप्रतिनिधिहरुलाई संघिय प्रणालीलाई फेल गराउन लागेको पनि आरोप लगाएका छन् । राई २०७४ सालमा रुपन्देही क्षेत्र नं. २(क) बाट प्रदेशसभामा नयाँ शक्ति पार्टीबाट उम्मेदवार बनेका थिए ।
रुपन्देही क्षेत्र नंं २ मा २०७४ सालको निर्वाचनमा एमालेका उपाध्यक्ष विष्णु प्रसाद पौडेल विजयी भएका थिए र यस पटक पनि सो पार्टीबाट पौडेल नै उम्मेदवार हुने निश्चित छ । तर अन्य दलहरुबाट को उम्मेदवार बन्ने हो अहिलेसम्म टुङ्गो लागेको छैन । दलहरुले आआफ्नै दावी छ ।
त्यसक्रममा गठबन्धनमा रहेको नेकपा एकीकृत समाजवादीले राजु गुरुङको नाम सिफारिस गरेको जनाइएको छ । गठबन्धनबाट माओवादी केन्द्र र नेपाली कांग्रेसको पनि दाबी छ । माओवादीबाट बामदेव क्षेत्री र विनोद पहाडी मध्ये एकलाई उम्मेदवार बनाउने सम्भावना रहेको छ भने नोपली कांग्रेसले युवराज गिरी र चुन्नप्रसाद पौडेलको नाम चर्चामा रहेको छ ।
उता क्षेत्र नं. ३ मा बर्तमान सरकारका गृहमन्त्री बालकृष्ण खाण नेपाली कांग्रेसकातर्फबाट उम्मेदवार बन्दै छन् भने एमालेका तर्फबाट घनश्याम भुसाल र बासुदेव घिमिरेको चर्चा रहेको छ । अघिल्लो निर्वाचनमा एमालेका भुसाल विजयी भएका थिए ।
२०७४ सालको प्रतिनिधिसभा निर्वाचनमा एमालेका नेता विष्णु पौडेलले ४४ हजार ३ सय मत ल्याएर जित हासिल गर्दा उनका प्रतिस्पर्धी नेपाली कांग्रेसका युवराज गिरीले २१ हजार ९३७ मत ल्याएका थिए ।
प्रतिनिधिसभा तथा प्रदेशसभा निर्वाचन नजिकीएसँगै उम्मेदवार हुनेहरुको चर्चा हुदा प्राय पुरानै नेताहरु चुनावी प्रतिस्पर्धामा देखिने गरेका छन् । राजनीतिक दलहरुका शिर्ष नेताले भाषणमा युवाहरुलाई हरेक क्षेत्रमा सहभागि गराउने दाबी गरेपनि तिनै नेताहरुको भाषण र व्यवहार भने ठिक उल्टो हुने गरेको छ ।
स्थानिय निर्वाचनमा युवा जनप्रतिनिधिहरुको अनुहार बाक्लै देखिएपछि आगामी मंसिर ४ गतेका हुन लागेको प्रतिनिधिसभा तथा प्रदेश सभा निर्वाचनमा युवाहरुको दावी बढदै गएको छ । अहिले युवामात्र होइन नयाँ अनुहार समेत चुनावी मैदानमा आउने तयारीमा छन् ।
प्रतिक्रिया